Aizawl: Union Minister of State, Food Processing Industries leh Jal Shakti changtu, Prahlad Singh Patel-a’n nimin khan Ministry of Food Processing Industries hnuaia Mega Food Park Scheme hmanga din, Zoram Mega Food Park, Khamrang tlawhin, state sorkar hmalak dan a lawmawm lo hle niin a sawi.
Nimin tlai khan Aizawla BJP pisa-ah thuthar thehdarhtute kawmin Patel chuan Zoram Mega Food Park atan sorkar laipuiin Rs. vbc 75.2 a ruahman thu leh Rs. vbc 45 pek chhuah a nih tawh a sawi a. Building leh hmanraw thenkhat hman tangkai theih tawh chinte awm tha thawkhat mah se hman tangkai a la ni lo nia sawiin, pawi a tih thu a sawi.
In tinin tui connection an neih theihna tura hmalakna chungchang pawh union minister chuan sawiin, “Mizoram sorkarin kum 2019-ah Mizoramah tui connection nei za-a 6.8 chauh an awm thu a sawi a, kum 2022-ah erawh Jal Jeevan Mission kalpui a nih hnuah za-a 70.46-in an neih tak thu leh kum 2023-ah chuan in tinin tui connection an neih theih tur thu an rawn report,” a ti a. Hemi kawnga state sorkar hmalaknate chu en zui tur a nih thu a sawi.
Khaw thenkhat a tlawhnaah Jal Jeevan Mission hnuaia state sorkar hmalakna chu a lungawithlak loh hle niin Patel chuan a sawi a. Tui lakna tur ngaihtuah hmasa lova hmalak nia a lan thu sawiin, tuizem pawh concrete-a siam tur a nih laiin hmun tam zawkah plastic tuizem hman a nih thu leh pipe pawh plastic pipe, reilo tea chhe mai thei tur hman a tam thu a sawi.
A nih dan tur ni lova thil tam tak kalpui a nih chhan chu hmalakna thlirleta thutkhawm huna state sorkar a zawhna tur a nih thu union minister chuan a sawi a. A hmalatu state deptt-in kum 30 daih turin ruahmanna an siam tur a nih laiin rei daih lo tura ruahman a tam hle niin a sawi bawk.