Aizawl: Aizawl East-II huam chhung, Chhinga Veng, Bethany-a Veng mipuite inkalpawhna leh bungraw phurh luh theihna tura motor kal theihna kawng siam hnathawh tanna chu nimin khan hman niin Chhinga Veng Pastor PB Mankima’n Pathian hnenah a hlan.
Bialtu MLA, Minister Robert Romawi a Royte-in thu sawiin contractor Lalmuanawma Sailo, Bethlehem Vengthlang chu department hotute, khawtlang hruaitute leh Bethany Welfare Committee hruaituten lungrual takin a hna thawktu tur atan an ruat a. A hna tanna tur, Electric Vengthlang leh Chhinga Veng inrina kawrah lei dawh hnathawh tan tur a ni a. Ministry of Tribal Affairs-in Social Welfare Deptt kaltlangin Rs nuai 140 a sanction a, a bak SASCI sum Rs nuai 50 pawh kawng thar atana hman tura ruahman a nih thu a sawi.
Minister chuan Bethany huam chhunga chhungkaw tam takin veng mipuite tana inkalpawhna siam a nih theih nan an ram phal taka an pek avangin lawmthu a sawi a, hnathawh tan nghal turah pawh veng mipuite leh Bethany Welfare hruaitute pawhin thawktute tawiawm zel turin a ngen.
Inkhawm hi Lalzuitluanga, Chairman, Bethany Welfare Committee-in kaihruaiin Er. C.Lalthangvela, E.E, PWD Aizawl Road North-in hnathawh dan tur ruahmanna sawiin khawtlang aiawhin H.Ramzawnga, Chairman, Chhinga Veng Local Council-in lawmthusawiin hun a hmang bawk.