MPYCC chuan Mizoram tlawhtu, Union Minister of State for Minority Affairs John Barla khak ngai khawpa Chief Minister Zoramthanga kaihhruai MNF sorkarin sum a tichingpen hi hnam anga mualphona tawp niin an sawi.
Congress Thalai chuan nimin khan thuchhuah an siam a, Union Minister Barla chuan sorkar laipuiin sum a pekte tichingpen thinah Mizoram sorkar a puh hi Kristian ram inti state-a thil thleng atan zahthlak an tih thu leh, hnam anga mualphona tawp a nih avangin Chief Minister Zoramthanga hoin MNF sorkar hian Mizoram larsap hnenah bânna theh lut ngei se an duh tih an sawi.
MPYCC hian Barla sawi danin Ministry of Minority Affairs atang ringawt pawhin infiamna, zirna, hostel sakna tur leh market sakna atante Rs. vaibelchhe 1,000 chuang Mizoram sorkar hnenah pek a ni tawh a; mahse, sum hman dan (utilisation certificate) an dilin, Mizoram sorkarin pek tur a nei lo chu zahthlak an tih thu sawiin, “Mizoram sum bawm enkawl tlakah Pu Zoramthanga kaihhruai MNF sorkar hi kan ngai lo a. Ram hmasawnna daltu leh Mizoram tithuanawptu bakah hnam dang leh central thuneitute hmaa hnam timualphotu an ni,” an ti.