Azl: Aizawla Chanmari YMA Hall-ah Mizoram Samagra Shiksha buatsaih hnam ziarang hmanga intihsiakna, State Level Kala Utsav 2022 neih a ni a. State Project Director Lalhmachhuana’n a hmanpui.
SPD chuan Kala Utsav-ah hian NEP 2020 ang chuan hnam zai leh lâmte chu zirlai peng pakhat a ni tawh a, ngaih pawimawh a hlawh tulh tulh tih a sawi a. Zirlaite chu an kal zelna turah hnam zia ngai pawimawh zel tur leh national level-a kal turte chu lawmman la thei ngei turin duhsakna a hlan.
National Level Kala Utsav-ah hian Mizoramin lawmman a dawng tawh thin a, 2021 pawh khan Visual Art 3D-ah lawmman 1-na a dawng.
Kumin Kala Utsav-ah hian district levelah govt school 47, Govt Aided pasarih, private school pasarih an tel a, zirlai 403 an tel a. State levelah District tin aiawh zirlai 103 an tel a. Heng zing atang hian national-a kal tur thlan an ni.
National-a kal turte hi mi 19 an ni a, January 3-7, 2023 chhungin RIE Bhubaneswar, Odisha-ah neih a ni dawn a ni.