Aizawl : Kolasib bialtu MLA, Minister of State ni bawk K. Lalrinliana’n nimin khan Middle School zonal sports, Southern zone chu Diakkawn Field, Kolasib-ah a hawng a. Zirna piahlamah rilru leh taksa hrisel a pawimawh thu sawiin, infiamna hmanga taksa sawizawi tam a țul thu a sawi.
Infiamna chu țhenrual țha siam nan te, mahni inrintawkna hmanraw țangkai a nih thu leh midangte nena thawhho zirna hun țangkai a nih thu pawh K Lalrinliana chuan a sawi a. Infiamna chu Mizo țhalai engemawzahin eizawn nan an hman tawh thu sawiin, kawng engkimah taimakna leh tih takzetna nen chuan hlawhtlinna a awm țhin thu a sawi bawk.
Middle School zonal sports hian tun thla ni 9 thleng a awh dawn a, football, volleyball, tug of war, running event, dead ball leh shot-put te hmangin zirlaite an inel ang. Govt. Middle School pali, Private school pahnih, Presbyterian School leh UPS School pakhat ve ve an tel a ni.
Kolasib bialtu Minister of state hian Inrinni kalta khan a bial chhunga Pangbalkawn leh Meidum-ah MSU buatsaih zirlai titha lawmpuina hun a hmanpui a. Meidumah Middle school hmunhma changtlung zawk nei tura ruahmanna a kal mek thu te, mipui mamawh tui lakna atan ni zung chakna hmang tangkai tura hmalak mek a nih thu te leh hmun hrang hrangah Health Clinic Centre bun thar mek a nih thu te a sawi bawk.