Aizawl : Champhai District chhunga Fostering Climate Resilient Upland Farming System in the North-East (FOCUS) hmalakna hrang hrangte ngaihtuaha ruahmanna siamtu, District Level Coordination Committee (DLCC) on FO- CUS thu nimin khan an Chairman, Champhai Bawrhsap James Lalrinchhana hovin Champhai Zote-a FOCUS kaltlanga hmarcha sawngbawl kaw nga hmalakna an enfiah.
Champhai Bawrhsap chuan FOCUS hnuaia project tha tak tak kalpui a nih avanga lawmawm a tih thu sawiin, mipui ten tangkai taka an chhawr theihna tura tanrual a pawimawh thu a sawi a. FOCUS District Management Unit Champhai kaltlanga Mizo hmarcha tharte hralhna leh sawngbawlna buaipui a ni chu remchang a tih thu sawiin, tharchhuah mai bakah a hralhna lam thlenga ngaihven tel chhunzawm zel a tul thu a sawi.
Thingtlangpa Foods Limited Liability Partnership (LLP) te hmalakna fakin, Bawrhsap chuan sum dehchhuah leh midangte eizawnna an sia- msak avanga chhuanawm a tih thu a sawi a. Hmarcha lakkhawm leh hralh bakah, midang tana lei itawm tura tihdanglam bakah organic products a nihna chawinun kawnga theihtawp chhuah turin a fuih bawk.
Sorkar thuchhuahin a tarlan danin, Thingtlangpa Foods Limited Liability Partnership (LLP) hian FOCUS, District Management Unit Champhai kaltlangin ‘Processing & Branding of Mizo Chilli’ project an kalpui mek a, he project atan hian Rs 49,98,903 ruahman a ni a, Rs 35,00,000 pekchhuah tawh niin, a bak la pek tur chungchangah nim- in khan an hmalak tawhnate enfiah a ni.
LLP hian Mizo hmarcha tharte chu Khuangthing, Bungzung leh Tuipuiral khaw dangte atangin an lei khawm ber a, Kg-ah Rs 270 in an lei. Kum 2021 atanga bultanin hemi kum hian ton 1 vel an lei a, kuminah, nimin thleng khan ton 9 vel lei khawm tawhin state pawn lamah an thawn tawh a. An la lei khawm mek zela, nakum January thla thlengin ton 25 thleng leia thawnchhuah theih an inbeisei.