Thawhtannia Russia-in Ukraine a kah leh hi chawlhkar riat chhunga tum riat beihpuia an beihna a ni ta a, a hma lawkin Moscow hian chet a thawh thar leh dawn nia sawina a awm lawk a ni.
Russia an chet hma lawk hian Russia ram lailia sipai thlawhna tumhmun pahnihah thil a puak a, hei hi Moscow chuan Ukrainian drone hmanga beih a nih thu leh Russian air-defence pawhin an lo hmuh thu an sawi.
Ryazan leh Saratov region-a thil thlengah hian serviceman pathum thiin thlawhna pahnih a chhe nual tih Russian defence ministry chuan a sawi a. Ukraine chuan he thil thleng hi engmah a sawi zui ve rih lo.
Airfield pahnihte hi Ukraine nena an inrina atanga kilometre za tela hlaa awm daih a ni a, Russian-ten February 24-a thapuia Ukraine an rûn atanga missile hmanga an beihna thlawhna hunna hmunpui a ni.
President Vladimir Putin chuan Zirtawpnia a koh thin, security council thutkhawm chu Thawhlehni khan a ko nghal.
Sorkar TV-in thutkhawm tan lai clip a tihchhuahah chuan Kremlin hruaitu hian an ram himna chu an sawiho tur pawimawh ber a nih thu a sawi tih a lang thei.