Indonesia-a parliament chuan dan thar siamin inneihna pawn lama mipat hmeichhiatna hman a khap.
Nupa kar lova mipat hmeichhiatna hmang chu kum khat thleng lung in tan theih a ni dawn a, kum thum lo awm leh tur atanga hman tan tur a ni.
Muslim ram lian ber zinga miah hian tun hnaia sakhuana lama duh khirhna pung zel karah hetiang khapna dan hi siam thar a ni.
Sawiseltute chuan mihring dikna chanvo atan ‘chhiatna lian’ tiin an sawi nghal a, khualzin hipna leh investment pawh nasa taka nghawng thei a nih thu an sawi bawk.
Pawl tam tak, a tam zawk thalai telna chuan Jakarta-a an parliament tualah dan thar duh lohna hi tun kar chhungin an lantir mek a. Court-ah pawh khin an tum.
Dan thar an siam hi tual chhung mi leh ram dang mi, Indonesia-a cheng leh chawlh hmanga an ram tlawhtute chungah pawh hman vek a ni dawn a. Innei si lova mipat hmeichhiatna hmang mante chu kum khat lung in tantir an ni ang.
Innei lova chen dun pawh khap a ni a, hetiang ti chu thla ruk lung in tantir an ni dawn a. Inuirena a thleng a nih chuan lung in tantir theih an ni bawk.
Dan thar thlawptute chuan dan thar hi sawiseltute pawhin an pawm tlan vek turin siam a nih thu an sawi a. Hremna pek tur hian complaint chu naupang, nu leh pa leh thil tisuala puhte ngaihzawng pawhin an thehlut thei tih an sawi.