Home Minister Lalchamliana’n Mizoram sorkarin a hnuaia thawkte dinhmun a tihthat em avangin thalai lehkhathiamten hmun danga thawh leh hna zawn an duh lo hial nia a lan thu a sawi.
He thu hi nimina 5th Bn. Assam Regiment atanga pension chhuaka intelkhawm, Ex-Fighting 5th Association (EFFA)-in Chhamb Battle Honour Day vawi 51-na a hmanpuinaah a sawi.
Home minister chuan, “Kum eng emaw zat kalta atangin IAS direct Mizo-in kan nei lo va, state pawna central sorkar hna tam takah pawh Mizoram atangin tling kan awm meuh lo,” a ti a, hei hi a chhan pakhat ni thei awm a rilrua awm chu Mizoramah sorkarin a hnuaia thawkte dinhmun a tihthat em avangin thalai lehkhathiamten hmun danga thawh leh hna zawn an duh lo hial ta em aw tia a ngaihtuah thin thu a sawi.
Manipur lama Zohnahthlakte erawh central sorkar office hrang hranga Group B lamah kum tin mi eng emaw zat an tling tih home minister chuan sawiin, Mizoram atanga thalai inziak tling erawh an awm ngai meuh lo chu ngaihtuah zui a tul thu a sawi a. Hemi lamah hian thalaiten an ngaihtuahna senga heng exam a tling ngei turin tan la se a duh thu a sawi.
Central sorkarin sipai lak dan thar a ruahman, Agniveer Scheme chu thalaiten an ngaihsak a tul nia a hriat thu a sawi tel bawk.
Home minister chuan sipai bângte leh an thlahte kal zelte chu Mizoram tan kawng hrang hrangin an thawhhlawk hlein khawtlang tan mi tangkai an nia a hmuh thu a a sawi a, Mizoram sorkarah te, khawtlang nun leh kaihhruaina kawngah te, Kohhran rawngbawlna lamah te leh politics thlengin sipaia lo tang tawhte thawhhlawkna tam tak sawi tur a awm tih a sawi bawk a ni.
Chhamb dat lawmnaah hian Sainik Welfare & Resettlement hotute, EFFA hruaitute, Mizoram Ex-Services League hruaituten thu a sawi a ni.
EFFA–ah hian sipai bângte bakah indonaa pasalthate hmeithai, an pasalten an boralsan tawhte pawh an tel a. Kum tin Chhamb Honour of Battle hi December 5-ah lawm thin a ni a, kuminah erawh remchan zawkna avangin nimin khan hman a ni.