Aizawl: Synod Inkhawmpui vawi 99-na chu nimin atang khan Khatla Kohhran Biak Inah tan a ni a, Pathianni thleng a awh ang.
Nimin chhunah khan Nomination Committee an thu a, zaninah inlawmna leh report inkhawm neih a ni a. Vawiin atanga Inrinni thleng, ni tin, chhun lamah rorel inkhawm a awm ziah ang a, zanah Pathian Biak inkhawm neih thin a ni ang.
Pathianni chawhmaah Pastor nemngheh leh Pro. Pastor dahngheh inkhawm neih a ni ang a, chawhnuah moderator-in Lalpa Zanriah Sacrament a theh ang a, zan Pathian Biak Inkhawmah moderator kal chhuak, Rev. Dr Vanlalnghaka Ralte-in thuchah a sawi ang.
Kumin Synod Inkhawmpui thlarau lam thupui chu ‘Pathian Lalna leh thuneihna’ (Rom 11:36) tih a ni a, Inrinni zanah Chaltlang bialtu, Rev. Lalsangmuana’n a sawi ang.
Kumin Synod Inkhawmpuiah hian Moderator chu Rev. Dr. C. Chawnghmingliana a ni dawn a ni.