South Korea coach Paulo Bento chuan 2022 World Cup-ah round of 16 atanga an tlak hnuah team a chhuahsan tur thu a sawi.
Kum 53 mi Portuguese coach hi kum 2018 August thla khan South Korea coach ni tura lakluh a ni a. Tun World Cup-ah Group H atanga round of 16 lut turin a ram Portugal chu inkhel hnuhnung berah an hneh a. An group-ah pahnihna an ni.
“Kan hmalam hun theuh kan ngaihtuah hi a ngai a, South Korea national team nen kan thawhhona hi tihtawp a hun.”
“He thutlukna hi player-te pawh ka hrilh tawh a, South Korea federation president hnenah pawh ka thlen tawh. He thutlukna hi September thla khan ka siam a ni tawh a, ka sawhsawn dawn lo.”
“He thutlukna ka puanzar rual hian engkimah South Korea federation leh player-te chungah lawmthu ka sawi a. Ka player-ten an theihtawp an chhuah avangin ka lawm hle. An manager ka ni thei hi ka inchhuang.” a ti.