World Cup 2022 round of 16 inkhel zan thumnaah Asia ram pahnih an tling lova. Japan leh South Korea te a tlawm zawkah tangin ram pahnihte tlawm dan a inang lo.
Kum 2018 final khel Croatia in Japan hneh turin penalty shootout an mamawh laiin Brazil in first half-ah goal li an khung.
Japan tan a teuh
Thawhtanni zan inkhel hmasa zawkah Croatia leh Japan te Al Janoub Stadium-ah an inkhel a. 1-1 a hun pangngaia an inhnehtawk hnuah penalty a chak zawk zawnnaah Croatia 3-1 in an vannei.
Croatia tan hun pangngaiah pawh che tha goalkeeper Dominik Livakovic chu an chhandamtu a ni a. Penalty vawi li a hmachhawn atangin vawi thum a save a, an ram chak theih chhan a ni.
Hun pangngaiah Japan an kheltha a. A bikin first half-ah chiang takin team chungnung zawk an ni.
Samurai Blue tia hminglem an vuah team hi an tlan peih a. Ball um-ah player kum upa lam tawh ngah Croatia in an pha meuh lo thin.
Halftime dawnah Japan in phu takin goal an khung. Maya Yoshida ball siamremsak chu Celtic forward Daizen Maeda chuan an hmahruaina goal ni turin a khung.
Second half-ah Croatia in an si phurh an sut har lo. Dejan Lovren-a ball cross tha tak mai chu Ivan Perisic chuan a tauh lut a. An ram chanchin a international inelna lian a goal khung hnem ber niin goal 10 a khung tawh.
Ram pahnihten goal an khung belh thei lova. Minute 30 pek belh an khelh pawhin goal hlauhawm tak an siam hleithei thin lova. Brighton midfielder Kaoru Mitoma pet Livakovic-a save leh lehlam goalkeeper Shuichi Gonda in Lovro Majer goal a khung tur a dan chu a langsar zual an ni.
An chak hnuah Croatia manager Zlatko Dalic chuan hmalam a thlir. “Tlang taka sawiin Brazil rinkai an ni a, tun World Cup a team tha ber chu anni hi an ni chiang.”
“Ka hmuh tawh chinah player-te theihna a sang a, an thiam rualin an rilru puthmang pawh a dik. Kan tan fiahna puitling zinga lian tak a ni ang.” tiin a sawi.
Brazil an lam
Mi tam tak ngaihah tun World Cup a team tha ber an nei. Round of 16 inkhelah dawt a ni lo niin a lang.
Stadium 974 a inkhelah first half-ah hneh takin South Korea an nghaisa a, goal li khungin 4-0 in harsatna nei hauh lovin an chak.
Brazil goal nawr hmuhnawm leh hlauhawm chuan South Korea tlarhnung hneh takin an nghaisa. Minute 7-naah Vinicius Junior chuan duhtawka petna hun a neih avangin chiang takin a khung a. Neymar-a’n penalty atang an goal hnihna a khung a. Brazil tan goal 76 a khung tawh.
Striker Richarlison-a’n an goal thumna a khung ve leh a. A ball khawih thiamzia an khingpuiten chhan dan tur an hre lo.
Minute 36-naah Vinicius-a siamsak atangin Lucas Paqueta chuan an goal li na a khung.
South Korea in substitute Paik Seung-ho hmangin second half-ah goal khat an khung a. A tawp thleng chungnung erawh Brazil an ni.