Union home ministry chuan India leh Myanmar ramri vengtu, Assam Riffles chu ramri uluk lehzuala veng turin a hriattir thar.
Paramilitary force thuneitute chuan sorkar laipui atanga thupek chu a chiang hle tih sawiin Myanmar ram atanga India luh tum, visa leh zin phalna nei thlap lo chu tumah tlangtir lo turin an ti niin an sawi.
Home ministry-in ramri vengtu sipaite hnena ramri ven tikhauh tura hriattirna a pek hi an ram a buai avanga tun hnaia Mizorama lut, Myanmar police office pariatte pe kir tura Myanmar thuneituten Champhai DC hnena an ngen hnua a tihchhuah a ni.
Myanmar thuneituten an ram mi India-a lut nia an hriat police pariat chauh an dil let chhan hriat a ni lo va. Mizoram home department chuan Myanmar mi 16 vel Mizoramah an raltlan tawh niin a sawi.
Assam Riffles hian India hmarchhakah hian khawchhak lama Myanmar nena inrina, km 404-a thui chu vengin Border Security Force chuan khawthlang lama Bangladesh nena inrina an veng ve thung.
India leh Myanmar inrina hi Free Movement Regime (FMR) an tih hmanga daidan niin a bul hnaia cheng hnam eng emaw zat chu ramri atanga km 16 huam chhung chinah, visa nei kher lo pawhin, tual chhung thuneituten zin phalna an pek chuan an kal kual reng thei.
Ramri atanga km 10 bial chhung velah hian khaw 250 chuangah mihring 3,00,000 vel an cheng a, ramri kânna (crossing) panngngai leh siamchawp zawng zawng nen hmun 150 velah a awm bawk.