Special Court (Prevention of Corruption Act)-in Kau-Tlabung Hydel Project leh Tuipang lui Mini Hydel Project sum eiruk thubuaiah PWD Enginer-in-Chief hlui, Er. Liansanga chu thiam loh a chantir a, vawiinah a hremna tur puan a ni ang.
Ukil-te hnen atanga thudawn danin he thubuai hi PRISM-te FIR thehluh atanga intan a ni a, thuhretu thahnem tak court-ah thu zawhfiah an ni a, thubuai hi 2016 khan hetihlaia Special Judge Lucy Lalrinthari’n ngaihtuahin ‘finfiahna tha a awm lo ve’ tiin, he thubuai hi a lo titawp (discharge) tawh a, PRISM lungawi lovin high court-ah an zualko a, thubuai tihnun leh a ni.
Thubuai hi ngaihtuah nawn a nih hnuah special judge hmasa, Vanlalenmawia’n ngaihtuah a awlsam zawk nan hlawm hnihah a then (split) a, thubuai pakhat tihtawp ni tawhin engineer (EE) pakhat leh supplier te thiam loh chantir an ni tawh.
Tuna thubuai tihtawp tak hi Post Tender Contract Modification chungchang a ni a, hemi avang hian Kau-Tlabung Hydel Project leh Tuipang lui Mini Hydel Project-ah hian nasa takin hna a khaihlak a, power siam chhuah tura ngaih hunah siam chhuah theih a nih tak loh avangin Mizoram sorkar chuan Rs. nuai 1,839.10 a châna ngaiah a ni.
Court thutluknaah chuan ‘power department chief engineer hlui hi Kau-Tlabung leh Tuipanglui hydel project siamna a contractor, Eastern Overseas Corporation chu duhsakna hleihluak taka duhsaka mipui sum cheng vaibelchhe tel luan raltir a ni’ tiin tar lan a ni a. A tira contractor nen inremna ziahah tender a thu delhkilh tihdanglam kawnga mawhphurtu a nih thu tar lan a ni bawk.
Thiam loh chantir, Er. Liansanga hi nimin khan jail-ah dah luh nghal a ni a, court chuan vawiinah hrem a nih dan tur a puang nghal dawn a ni.