Aizawl : Congress thalaiin India sorkar laipui BJP kaihhruai chu Mizoram sorkar, Zoramthanga kaihhruai lakah a beidawng ta niin an sawi a. “Sum leh paiin rawn vur thin mahse, sum an pek zat atanga tehin hmasawnna thar an hmuh loh thu Mizoram tlawhtu Minister apiang ten an sawi ta zel a, MNF sorkar chu sum enkawl thiamlo an nih zia nitinin a lang ta zel a ni” an ti.
Chief Minister Zoramthanga’n Mizoram Assembly House-ah Jal Shakti Minister Sekawat-a’n sum a rawn pek tum chu a tam lutuk a tih avangin a zat pawh a sawi duh loh hial thu a lo sawi tawh tih Congress thalai chuan sawiin, Mizoram rawn tlawhtu Jal Shakti changtu Minister of State Prahlad Singh Patel erawh chuan thuthar thehdarhtute hmaah Mizoram sorkarin Jal Shakti Mission a kalpui danah tui lakna tur pawh enfiah mumal a nih loh thu a sawi leh thung si niin an sawi.
Congress thalai ch- uan Central sorkarin Mizoram sum a rawn pek te chu eng atana hman nge a nih Mizoram sorkar an zawt a, “Mizoram khaw tinah MNF sorkar hnu hian tui kan harsa ta em em a. Mipuite harsatna sukiang turin central sorkarin pawisa rawn sanction thin mahse, kan harsatna a ziaawm thei lo hi pawi kan ti hle” an ti.
“Central atanga sum thahnem tak lo kal thin chu mahni unaute sum kawlbelhsak atan an paipawn belh zel nge? tih hi Congress thalaite zawhna a la ni reng” an ti a. Tui harsatna sutkianna tur sum lo kal pawh SEDP sum atan an pawtpeng zawk em ni tih sawifiah turin Mizoram sorkar an phut bawk.