Belgium playmaker Eden Hazard chuan kum 31 mi niin international football a chawlhsan tih a sawi.
Attacking midfielder leh winger a chhawr theih Hazard hian kum 17 mi lek niin kum 2008 khan ram tan a inkhel tan a. Vawi 126 inkhel hmanin goal 33 a khung.
Kumin World Cup-ah Belgium in group stage an pelh theih loh hnuah a thutlukna hi a siam.
“Vawiinah bung thar ka kai dawn a, in mi duhsakna leh min thlawpna zawng zawngah lawmthu ka sawi.” tiin social media kaltlangin a thutlukna hi a puang.
“Kum 2008 atangin hun hlimawm tak takte min siamsak thin. Tunah chuan ram tana ka inkhelh thin chu ka duhtawk tawh dawn. Chhuan thar zawkten min thlak hun a thleng ta. In zavai hian ka ngai hle ang che u.” tiin Belgium tantute a thlah.
Hazard hi kum 2018 World Cup a semi-final thleng thei team-ah khan a tel a. Hemi tum hian champion team France laka 1-0 a an tlawm hnuah pathumna inchuhnaah England an hneh.
Belgium tana inkhel thei naupang ber pariatna niin an ram captain tum 56 a ni hman a. World Cup vawi thum leh European Championship vawi hnih a khel hman.
Tun World Cup-ah khan an match thumah a inkhel vek a. Belgium hian goal khat chiah khung a, knockout stage an tlin zawh loh avangin manager Roberto Martinez pawh Ningani khan a lo bang tawh.
Hazard hian club lamah kum 2019 khan Pound maktaduai 150 man hu vela ngaih turin Real Madrid a zawm a. Spain-ah erawh La Liga title vawi hnih leh Champions League vawikhat chawi mahse beisei pha lo hle in a khel tlem viau a. Tun nipuiah chhuak tura ngaih a ni.