Portugal in an player lar ber an telh lohin kumin World Cup chawi thei tura rinkai an ni tih an lantir a. Morocco in huaisen leh inpekna in Spain ball thiam rual an vel thung.
Thawhlehni zana quarter-final luh inchuhnaah North Africa ram team in penalty hmangin Spain an hneh a. Portugal in Switzerland lakah goal ruk an khung.
Enrique-a a hawihai
Education City Stadium a inkhelah Morocco fans thawm a tha a, inkhel a zawh meuh chuan lawmin an au nasa.
Minute 120 chhung goal a luh loh avangin penalty shootout hmanga chak zawk zawn a ngai. Spain in vawi thum an pet a, an pet goal lo vek.
Spain a piang leh seilian, Paris St-Germain full-back leh Morocco star player Achraf Hakimi chuan chakna penalty inringtawk takin a khung a. Luis Enrique leh a pawlte an thawn haw.
An inkhelh chhungin Spain in an tum angin an khel, ball an chang hnem. Morocco in ball thunun tir an pawi ti lova, tharum inbeihnaah an chak zawk dawn tih hria in an khel a. Spain in tihvak ngaihna an hre lo.
Goal hlauhawm a tam lohna inkhelah Spain in Dani Olmo khung teuh chu an chakpui thelh a, mahse teuh a tawk lo.
Morocco coach Walid Regragui chuan, “He team-ah hian chhungkaw boruak kan siam a, tupawh hi kan inthlawp tlat. Tournament tan khan Croatia, Belgium leh Spain te lakah kan tlawm lovang tih hi min hrilh lawk ula, engmah sawi lovin ka pawm ang.” a ti.
Portugal an tha
Portugal coach Fernando Santos chuan thutlukna huaisen a siam. Group stage a kheltha tawk lo Cristiano Ronaldo chu starting XI-ah a telh lova, a aiah Benfica striker beiseiawm Goncalo Ramos a khelhtir. A ti fuh.
Ronaldo hi South Korea nen an inkhelh tumin an thlak avangin a lungawi lova, hei hian sawizui a ti tam. Mahse Santos-a’n a awltir chhan chu an inkhelh duhdan vang a ni tih a sawi thung.
Kum 21 mi Ramos-a’n khelmual chhunga a tih theih tawh loh chu awlsam taka ti vekin Portugal goal nawr a hlauhawm a, ball an chan apiangin a goal mai dawn a ang thei hle.
Minute 17-naah goal hmahruai khungin minute 33-naah veteran defender Pepe chuan a khung belh.
Minute 51-naah Ramos bawkin khungin minute 55-naah Raphael Guerreiro chuan a khung belh a. Minute 67-naah Ramos-a’n hattrick a siam a. Ronaldo luh hnuah goal-ah khung mahse a offside thung.
Substitute dang Rafael Leao chuan minute 92-naah goal mawi a khung ve leh bawk.
Manchester City defender Manuel Akanji chuan Switzerland tan goal khat a khung ve thung a ni.
Inkhel zawhah Santos chuan Ronaldo chungchang zawhna a chhang a. “Kum 19 a nih atangin ka hre tawh, kan inkar a tha hle. Inkhel a chak tura kan tih ngai leh ani nena kan inkar hi a inkaihhnawih ngai lo.”
“Manager ka nihna angin ani hi kan squad-ah a tel ngei a pawimawh hle ah ka ngai.” tiin a sawi bawk.