LPS Pro Muaythai welterweight champion Zarmawia’n inelna hrang pahnih a Mizoram champion nih kawp tumin Lalmuanpuia a hmachhawn dawn a, Mizoram Fight League featherweight title an inchuh ang.
Zanin dar 8-ah Dawrpui Multipurpose Centre-ah Mizoram Fight League 2 title fight buatsaih a ni dawn a, LPS One-ah live-a pek chhuah tur niin weight hrang paliah champion kawnghren an inchuh dawn bakah pathumna inchuh leh exhibition bout a awm tel ang.
Zarmawia hian a thiamna leh hriat a hlawhna MMA-ah chona a hmachhawn leh dawn a, MMA huangah vawi 17 chak tawhin tum khat a tlawm a, Muanpuia lakah rin hlawh zawk ni chungin cage chhungah a lut dawn. Mizo fighter zinga chhuata tang thiam ber tia chhal ngam a ni a, ding chunga inhmachhawnah ke leh kut a hmang thiam tel.
Sihphir fighter Muanpuia’n featherweight title chuh thei turin Rosangzuala lakah unanimous decision-in hnehna a chang a, MMA huanga vawi hnih a inbeih tawhah chak ve vein Zarmawia hmaah a nihna chiang zawkin a lang ang.
October 28 khan kum 24 mi Chite Veng fighter Zarmawia hian cage chhungah split decision-in Isaac Lalchhuanmawia a hneh a, Muaythai champion kawnghren a hreng mek.
Anni pahnih bakah hian strawweight, flyweight leh bantamweight title inchuhna te pawh a awm ang.