- Ruata
Lirthei company hrang hrangten November, 2022 thlaa lirthei an hralh dan a chhuak leh ta a. Tun tumah hian India rama lar thar leh lirthei huang lei hlawh em em, SUV huanga lirthei hralh kal zual 5 te kan thlir ho dawn a ni.
Tunhnai chhoah hian India ram pumah SUV hi hralh a kal em em a, SUV hralh kalna chhan pakhat nia sawi theih chu rei vaklo atanga compact leh Sub 4 meter SUV chhuah vang hi a ni pakhat niin a lang a. Nidanga car te, hatchback kan tih ho leina man khan SUV lian lo chi, kan han sawi tak huanga kha duhthlan tur a awm ta a. Heng SUV te hi tam tak chu hatchback te aiin a khan a sang a, a chhung a zau nuam a, SUV puitling landan a design-ah te a pu tho bawk nen hei hi lei a hlawh nasat chhan a ni a. Hei lo pawh hi chhan tam tak a awm ang a, India ramah hian SUV lei hi an uar thar ta viau a ni.
SUV hralh kal zual ‘top 5’ te chu han thlirho a ila-
- Tata Nexon – 15,871
Tata Motors hian an SUV hralh kal tak mai Nexon hmangin hma an rawn hruai a, he lirthei hi thla liamta chhung khan 15,871 hralhchhuah a ni. SUV huang chauh mai pawh ni loin passenger car huang hrim hrimah pawh Tata Nexon hian pahnihna dinhmun a hauh hrim hrim a, he SUV khan sang, mawi leh changkang bawk si hi India mipuiten an lei nasa hle a ni. Passenger car-ah pawh hetiang dinhmun a rawn hauh thei a nih chuan lirthei hralh kal em em dang Maruti Alto, Maruti Swift, Maruti Wagon R, Dzire, Ertiga, Hyundai Creta, Tata Punch leh Maruti Brezza te ho pawh a rawn khum vek tihna a ni.
Tata Nexon hi nikum Novermber thla kha chuan 9,831 hralhchhuah a ni a, hei hi a khaikhin dan thin niin year-on-year sales khaikhinna an ti a, a hma chiah kuma a thla ngai chiah nen an khaikhin thin a ni. Heti a nih chuan nikum November thla aia an hralh zat punna (year-on-year sales growth) chu zaa 61 lai a ni.
- Hyundai Creta – 13,321
Hyundai SUV lar leh hralh tam em em, midsize SUV huanga mi, Creta pawhin November 2022 chhunga SUV hralh kal zingah pahnihna dinhmun a rawn luah thei a. Nikum aia an hralh zat punna hi zaa 29 a ni a, nikum November thla khan Creta hi 10,300 hralhchhuah a ni.
- Tata Punch – 12,131
Tata Motors SUV zinga a te ber, Tata Punch hi an tlangzarhna a la rei loh ang aiin hralh a kal hle mai a. India mipuiin an duh hle tih a chiang awm e. Thla hmasaa SUV hralhchhuah tam ho zingah pawh pathumna dinhmun a rawn hauh pha nalh mai a, Tata in hralh tam lama ‘top 5 SUV’ zinga pahnih an nei thei hi an tan chuan chanchin lawmawm tak a ni awm e. Punch hi thla hmasa khan Tata Punch hi 12,131 an hralhchhuak a ni.
- Maruti Brezza – 11,324
Thla hmasa khan Maruti Suzuki compact SUV lei hlawh em em Brezza chuan palina dinhmun a rawn hauh thung a. Brezza hi 11,324 hralhchhuah niin hei hi nikum November thlaa an hralhzat 10,760 nena khaikhin chuan nikum aia a punna hi zaa 5 a ni. Brezza hi Mizoramah pawh hralh a kal chho leh tan viau a, Brezza mai bakah hian tuna ‘top 5’ kan tarlan ho hi chu Mizoramah pawh hralh kal leh lei hlawh tak vek an ni.
- Hyundai Venue – 10,738
Hyundai pawh hian SUV hralh kal 5 zingah lirthei pahnih an rawn nei thei a, hei pawh hi company lam tan chuan thil lawmawm tak a ni dawn a. Hyundai Venue hi Hyundai atanga compact SUV mawi leh changkang, hralh kal bawk si a ni tih kan hre theuh awm e. Sawi tawh angin Creta hnuah Venue hi thla hmasa chhunga lirthei hralh kal zual panga zinga Hyundai SUV lang tel ve pahnihna a ni a. Thla hmasa khan 10,738 hralh niin nikum November thla khan 7,932 hralh a ni thung a, nikum aia a punna hi zaa 35 a ni.