India rama tun hnaia state pahnih inthlana vote tlate chu Ningani khan chhiar a ni a. He chanchin ziah lai hian result kimchang la hriat vek lo mah se Gujarat-ah chuan BJP bawkin chiang takin hnehna an chang leh a, Himachal Pradesh-ah Congress-in sorkarna an siam thei dawn thung.
Gujarat-ah hian BJP chuan a zawna vawi sarih nan thuneihna an chang leh dawn.
BJP sorkar thar lak luh hi Thawhtannia neih tura ruahman nghal a ni a, state party President C R Patil-a chuan Gandhinagar-a BJP headquarters-ah hei hi sawiin Chief Minister Bhupendra Patel leh hruaitu dangte chuan mipuiin an party an la rintawk avangin lawm thu an sawi.
BJP atang hian an hming langsar – Chief Minister Patel leh minister zinga Harsh Sanghavi, Kanubhai Desai, Manisha Ben Vakil leh Rushikesh Patel te chu an tling leh hlawm a. Thalai hruaitu, Alpesh Thakor leh Hardik Patel te pawh an tling.
Congress atangin Shailesh Parmar, Arjun Morvadhia leh Imran Khedawala te chu an bial ngaiah thlan tlin leh an ni a. An hruaitu hlun, Paresh Dhanani leh Opposition Leader Sukhram Rathva te erawh an tla thung.
AAP chuan Gariadhar, Jam Jodhpur leh Visavadar an la tawh a. Chief ministerial atana an vawrh chhuah, Ishudan Gadhvi erawh chuan BJP candidate Ayar Mulubhai Hardasbhai Bera a hneh lo thung.
Kum 2017 khan BJP hian bial 99-ah hnehna changin seat 182 awmna assembly-ah Congress-in bial 77 an chang bawk a. Khawthlang lam state-ah hian saffron party hian kum 1995 atangin thuneihna an chang tawh.
Himachal Pradesh-ah chuan Congress chuan bial 39 an la tawh a, BJP chuan 18 an la tawh bawk a. Independent-a chuhten bial thum an la tawh bawk a, Congress hian sorkar an siam thei tawh.
Chief Minister Jai Ram Thakur chu Seraj bialah thlan tlin niin Congress candidate Chet Ram a hneh a. BJP candidate Rakesh Kumar chu Sundernagar bialah tlingin Congress candidate Sohan Lal a hneh bawk.
BJP candidate Anil Sharma chu Mandi bialah thlan tlin nawn leh a ni a. BJP bawk, Ranbir Singh chu Nurpur bialah a tling bawk a. Congress candidate Jagat Singh Negi chu Kinnaur-ah tlingin BJP atanga a khingpui, Surat Negi a hneh.