Kum 2002-a Bali nightclub pahniha bomb puaka a mawhphurtute chhuah zalen an ni a, Australia-ah chuan thinrim leh hlau an tam hle.
Bomb puak pahniha dam chhuakte chuan ‘dam chhung tan ina tang ang’ an nih thu an sawi.
“Ka nun hi kumkhuain a thlak danglam a ni,” tiin an zinga pakhat, Andrew Csabi chuan BBC a hrilh.
Nilaini khan bomb tihpuah takte siamtu ber, Csabi-a thiante tihlumtu leh amah ngei pawh a bân pahnih tan ngaia a awm phahna thlentu chu Indonesia tan in atang chhuah a ni.
Indonesia chuan Umar Patek-a hi chi leh sakhaw bik a lang vungna a reh tawh tih an sawi a; mahse, chhuah lailawk a ni chuan mi tam tak a tithinrim a, a bikin thi zinga mi 88 zette ram, Australia-ah phei chuan an thinrim zual hle.
October 12, 2002-a bomb puakah hian ram 21-a mi 202 vel an thi a, Indonesia-ah chuan firfiak beihna rapthlak ber a la ni reng.
Patek-a hi al Qaeda firfiak pawl nena inzawm, Jemaah Islamiah (JI) tana bomb siamtua puh a ni a, kum 10 dawn man a nih hmain a tlan bo.
Kum 2012 khan kum 20 chhung lung in tang tura hrem a ni a, tunah hian a zahve vel chauh a la tang tlingtla.
Indonesian thuneitute chuan mi hlauhawm a ni tawh lo tih sawiin, tan ina a nungchang that vangin chhuah lailawk theih dinhmunah a ding tih an sawi.
Bomb puaka a thiante panga lai chân, Australian Jan Laczynski chu mak ti leh thinrim zinga mi a ni.
“He pa hian nunna a nei leh ta a ni. Kan zinga mi tam tak hian kan nun kan nei let thei lo,” tiin Ningani khan BBC a hrilh.
“A rapthlak a, a dik lo tak zet,” a ti.
Beihna thleng ruahmantu ber, Abu Bakar Ba’asyir-a nikuma chhuah a nih tawh hnuah tuna Patek-a chhuah leh a ni chu ril khei nawn lehna a nih thu a sawi bawk.
Csabi-a chuan chhuah a ni hian hlauhna a siam leh tih a sawi a. “Him niin kan inhria, tunah erawh chuan kha kha a bo leh ta,” a ti.
Dam chhuak zinga mi tlem chauhvin Patek-a hi a insiam tha tawh nia an ngaih thu Laczynski-a chuan a sawi.
“Lung inah ka hmu a, hnai takah a ni ka hmuh, thil la vawng chi a nih hmel tawh lo,” a ti.
Australian sorkar chuan Patek-a chhuah a ni hi an duh lo va, Indonesian thuneitute hnenah pawh a chevel vil reng tura na taka ngen an tum.
Patek-a chhuah hun hi bomb an tihpuah hun kum 20-na liam hnu leh Krismas dawn a ni kher hian sawi a hlawh phah.
Patek-a hi chhuah ni mah se April, 2030 thleng ‘mentoring programme’ hnuaiah a awm a ngai a. Tharum thawhna lam chi a nei a nih phawt chuan chhuah lailawk a nih hi a tawp nghal dawn tih Indonesian law & human rights ministry chuan a sawi.