Central Bureau of Investigation chuan nimin khan Yes Bank dintu, Rana Kapoor lakah thubuai a siamsak ta a. FIR a ziah luhah Kapoor chhungkuain an thunun company hrang hrang hming pawh an ziak lang bawk.
CBI-in FIR an ziah luhah hian Kapoor chhungkaw ta, DoiT Ventures-in an enkawl, Dewan Housing Finance Corporation Ltd leh a company dangte pawh tar lan tel vek a ni a. Kapoor hi Yes Bank sum dinhmun a tlakchhiat hnuah Enforcement Directorate pawhin thu zawh fiah atan lo la tawhin nimin vek khan an custody-ah March 11 thleng awm turin Mumbai-a special holiday court chuan a ti.
ED hian Kapoor hi nimin zing khawvar hma, zing dar 3:00 velah Prevention of Money Laundering Act (PMLA) hnuaiah Dewan Housing Finance Corporation Ltd (DHFL) nena inkungkaihna nei sum kal buai chungchangah an man a. Darkar eng emaw zat thu an zawh hnuah court-ah hruaiin court hian an kawl rih a lo phalsak bawk.
Kapoor-a din, Yes Bank hian sum tam tak a puktirte rulhna a hmuh that leh si loh avangin tunah hian a talbuai mek a ni ber a. Ningani khan Reserve Bank of India chuan board thuneihna pawh ni 30 chhung atana chhuhsakin ngai a awh leh theih dan tur an ruahmanpui mek a. Sum dahtute pawhin thla khat chhungin Rs. 5,00,000 chauh an lak phal a ni rih.