Mizoram Synod Inkhawmpui vawi 99-na, Khatla Kohhran Biak Ina neih meka nimina rorel inkhawmah chak zawka corruption do rel a ni.
Nimina rorel inkhawmah khan General Agenda No. 3-na, ‘Corruption do leh a kaihhnawih chungchang’ rawtna awm chu ngaihtuah ho a ni a, rorel palaiten an sawiho hnuah, “Tuna kohhranin a kalpui dan aia tha leh chakin kalpui ila, SEC-in lo bawhzui se,” an ti.
Corruption do leh a kaihhnawih chungchanga hmalak rawtna hi Presbytery pariat – Champhai North, Tuichangral North, Aizawl Bethel, Tuivai Hmarphei, Chimphei, Aizawl Central leh Aizawl East atanga lut a ni.
Nimin khan General Agenda 42 zinga No. 3 atanga 20 thleng ngaihtuah hman a ni a, pian pun chungchanga hmalak rawtna awm chu bial leh tual chhung kohhranah uar zawka inzirtirna kalpui ni se, an ti.
Mizo mipa thi rate sang mek a ziaawm theih nana hmalak rawtna chu pawm a ni a, ram hruaitute khalh ngil tura Synod-in tun aia chak zawka hma la tura rawtna awm chu pawm a ni bawk a, SEC bawhzui turin dah ve ve a ni bawk.
Heng bakah kohhran huanga hmalakna tur hrang hrangte an rel bawk a. Rorel inkhawm hi vawiinah chhunzawm leh a ni ang.
Agenda-a tel, la ngaihtuah tur zingah – politics siam tura hmalak rawtna, inthlanna felfai neih theih nana hmalak chungchang rawtna, Mizorama cancer a lo tlem theihna tura hmalak rawtna, Mizoram state lottery tihtawp rawtna, Mizoram grape thar atanga siam sakramen wine atana hman rawtna leh jail tang chhuak hlimte tan chawlh lailawkna siam chungchang rawtna te a tel a ni.