Aizawl: MPCC Treasurer Zodintluanga Ralte, Thorang bialtu MLA chuan a bial chhunga Phairuangkai khaw golden jubilee lawmna a hmanpui.
Golden jubilee lawmna hi Phairuangkai Playground-ah neih a ni a. Lawmna inkhawm neih hma hian Phairuang lei bula jubilee lung phun chu bialtu MLA chuan a hawng hmasa.
Hemi hnua jubilee lawmnaah thu sawiin Zodintluanga Ralte chuan, “Kumina ka bial chhung khaw hnih, Rotlang West leh Phairuangkai khuaten golden jubilee an lawm thei hi a ropui takzet a. Pathian malsawmna leh khaw inlungrualna avang chauha lawm thei kan ni tih kan hriat a pawimawh,” a ti.
Zodintluanga Ralte chuan Phairuangkai khaw din tirh tê atangin a nu leh paten huan an neih avanga vawi tam tak kala mahni khua ang maia an lo khawsakna thin a nih thu a sawi a. An chhungkua pawhin Phairuangkaiin Golden Jubilee an lawm thei chu an lawmpui takzet thu a sawi bawk.
Phairuangkai khaw din tan dan sawiin an khaw VCP Lalthanmawia chuan, kum 1972 khan thlawhbawk permit an neih thu leh khaw hmun nghet ni turin khua hi an din tan a. Kum 1984-ah Village Council nei tanin, he khaw hmasawnna tur atan hian bialtu MLA Zodintluanga Ralte-in theihtawp a chhuahsak thu a sawi.
Ani bakah hian an bialtu MLA lo ni tawh zawng zawngte leh BDO lo ni tawh zawng zawngte chungah lawm thu a sawi.
Phairuangkai khua hi Lunglei atanga km 40-a hlaa awm a ni a. In 341 ni mekin mihring 1,490 an awm a, VC member panga awmin, kohhran hrang hrang 10 an awm mek a ni.