Aizawl : Durtlang – Leitan leh Sihphir inkar kawng zauh leh siamthat hnathawk turin Mizoram PWD hnenah NOC pek a ni dawn a. Km 10.25 a thui he kawng zauh leh siamthat hna thawk tur hian state PWD hnena NOC pe turin Project Pushpak CE hriattir a ni tih Border Roads Organisation hotu ten nimin khan Lok Sabha MP C Lalrosanga an hrilh.
Sorkar thuchhuahin a tarlan danin he kawng zauh leh siamthat nan hian Ministry of Road Transport and Highways-in Rs. vaibelchhe 46.57 a ruahman tawh a ni.
Nimin vek khan Bairabi – Kolasib kawng 2 lane-a siam na turin Rs. vaibelchhe 86.81 ruahman a ni tih Lok Sabha-ah ziaka tarlan a nih thu sorkar thuchhuah chuan a tarlang a. Tun sorkar kum chhunga hmarchhak bial state hrang hranga Rs. vaibelchhe 258 senga kawng km 56-a thui siam tur project zingah National Highway 154-a 2 lane-a km 16-a thui Bairabi – Kolasib kawng siamna tur hi a tel tih Road Transport and Highways Minister Nitin Gadkari-a’n ziakin a tarlang tih Lok Sabha MP C. Lalrosanga’n a sawi bawk.