Aizawl : Ningani khan Govt Primary School – VII, Vairengte chuan an school kum 25-na, Silver Jubilee lawmna hun an nei. He hunah hian Serlui bialtu MLA Lalrinsanga Ralte, Vice Chairman, Rubber & Allied Crops Development Board ni bawk chuan khuallian niin a hmanpui.
Lalramhluna, Organising Chairman kaihhruai Jubilee lawmna inkhawmah hian khuallian chuan Govt. Primary School-VII, Vairengte-in Silver Jubilee hial lawm thei a an awm chu lawmawm a tih thu a sawi a. Primary School chu zirna kailawn zawh chhohna tura kawng pawimawh leh bul tanna a ni a; chuvang chuan, zirtirtute pawh an rawngbawlna a ngaia an thiam leh theihna te chu zirlai te tan hmang a, zirtirna kawngah theihtawp chhuah turin a fuih a. Khawtlang mipui te pawhin kan fate chu zirna ngaipawimawh tura an fuih sauh sauh a tul tih a sawi.
Lalrinsanga Ralte chuan Chief Minister leh Education Minister te’n theihtawp chhuaha hma an lakna azarah Mizoram sorkar enkawl zirna in te chuan hma a sawn chho zel a, kum tina sorkar enkawl zirna in a zirlai an pung chho zel te hi a lawmawm a tih thu a sawi a. Zirlaite chu an zirlai bakah ram leh hnam hmangaihna te, nationalism chungchang te an zirtir tel a, an rilruah tuh a pawimawh tih a sawi bawk.
Serlui bialtu MLA hian Govt Primary School-VII Silver Jubilee tlin lawmpuina atan hian computer set a pe a ni.
Jubilee lawmna hman zawh hnu hian Serlui bialtu MLA hian Jt. YMA Field, Vairengte-a phul lem (artificial turf) phah tur chu Vairengte Jt.YMA hruaitute nen an enho nghal a. Vairengte-a phul lem phah tur hi Special Assistance to States for Capital Investment (SASCI) hnuai atanga siam tur niin, a siamna tur sum hi sanction fel tawh a ni.