Formula 1 chuan kum 2025 thleng Netherlands-ah intlansiak a buatsaih dawn a. Dutch Grand Prix nei chhunzawm turin contract a pawtsei.
F1 hian kum thum inremna an ziah phawt hnuah Circuit Zandvoort a intlansiak tur hian kum 2024 leh 2025 a ziah belh leh a. Kum 2021 atanga Formula 1 calendar a telh a nih leh hnuah Red Bull car khalhtu Max Verstappen vangin intlansiak entu mipui an thahnem thei hle.
Dutch driver hian Amsterdam khawpui piah lawka awm tlankawngah hian hnehna vawi hnih a chang tawh a. Nakkum-ah hian Dutch driver dang Formula E champion ni tawh Nyck de Vries pawh intlansiak tawh dawnin Williams car a khalh dawn.
Formula 1 president leh chief executive Stefano Domenicali chuan, “Dutch Grand Prix hi kan intlansiak neih hova fans te ngainat zingah a invawrh a, kum hnih chhungin kan intlansiak neih hlawhtling tak takte zinga a invawrh sang zual a ni.” tiin a sawi.
Sprint race a pung
F1 hian season tharah ‘sprint weekend’ an neihna tur an tipung a. Azerbaijan, Austria, Belgium, Qatar, USA leh Brazil-ah te ‘sprint race’ Inrinni ah an nei ang.
Kum hnih chhung an lo neih tawh ‘sprint race’ hi F1 hian tihpun a tum sa tawh a ni a. Eng tlankawngte nge tha ang tih zirchianna an neih hnuah intlansiak buatsaihtute nen indawrin an neihna tur an tichiang thei ta a ni.