Ultimate Fighting Championship chuan nakkum March 18 hian London-ah pay-per-view inelna lian UFC 286 a buatsaih tur chu a nghat dawn.
Mixed martial arts inelna lian hian Nilaini khan London a O2 Arena-ah inelna hi an neih tur thu an puang a. Thla 12 chhunga London a UFC in inelna a buatsaih tum thumna a ni ang.
United Kingdom-ah hian UFC in inelna a buatsaih tawh ho zingah Fight Night ni lova number chuanna inelna a buatsaih vawi hnihna chauh a ni dawn thung.
Number inelna a neih hnuhnun ber hi kum 2016 khan niin hemi tum hian Manchester Arena-ah champion lai British fighter Michael Bisping chuan a middleweight title chu Dan Henderson lakah a humhim.
UFC 286 fight card tur hi puan erawh a la ni lova. UFC president Dana White chuan, “United Kingdom a kan fans te ka lawmzia hi mi zawng zawngin an hria. Kuminah London-ah show hlawhtling tak tum hnih kan nei tawh a. Tun tumah hian March 18-ah O2 Arena-ah hian world title fight awmna fight card hmuhnawm leh tha thei ang ber kan siam dawn.”
“UK MMA hi a thang a, title thar tha tak tak lo chhuahna a ni. Nakkum a kan talent rawn phochhuah turte hi an nghahhlelhawm tawh tak zet a ni.” a ti.
August thla khan UFC chanchin a British mi champion thei pahnihna chauh ni turin Leon Edwards chuan welterweight champion Kamaru Usman a lo hneh tawh.