Aizawl : Sialsuka Zofest 2022 neih mekah Ningani zan khan khuallian niin Health Minister Dr R Lalthangliana hian a hman pui a. Zofate inhmangaihna ang hi hnam dangte neih ve phak loh a nih thu a sawi.
Dr R Lalthangliana hian, Zofate hi khawvelah an inzarpharh nasa tawh hle tih sawiin, “Europe ram thlengin ka fang chhuak a, kan tlem emaw kan tam emaw kan awm ve zel a ni. Geographical boundary hian Zofate min then mah se; Zofate hi kan thinlungah kan inthen dawn lo, kan inpumkhat telh telh dawn a ni,” a ti.
Health Minister hian Myanmar tual chhung buaina avanga Zohnahthlak unau lo tla thlate chunga that chhuah a, USA leh tuipui ral ram hla tak tak atanga tanpuina lo luang chhuak chu ropui a tih thu a sawi a. Bangladesh lama Zohnahthlak te harsatna tawh mek chu a tawp thlenga phur taka dawnsawn an nih thu sawiin, “Kan ei chuan an ei ve zel ang a, kan nghei leh kan nghei tlang mai ang,” tiin, Zofate inhmangaihna ang hi hnam dangte neih ve phak loh a nih thu leh, engtik niah emaw chuan Zofate hi inzawmkhawmin, inpumkhata rorelna pakhat hnuaia awm hun a la thleng ngei dawn niin a sawi.
He hunah hian H Lalbiakzauva chu uaptu niin, ‘Chhul khat kual kan ni’ tih thupui hmangin Lalhruaitluanga Chawngte, MZP Adviser in thu a sawi bawk.
Zirtawpni khan South Tuipui bialtu MLA Dr R Lalthangliana hian S.Chawngtui khuain kum 50 tlin, golden jubilee an lawmnaah jubilee dar vuain a hmanpui a, jubilee lungphun a hawng nghal bawk.
Dr R Lalthangliana hian S Chawngtui in golden jubilee a lawmpui nan Rs 50,000 leh oxygen concentrator leh thingpui lumna dekchi lian a hlan bakah, kumin December thla chhung chu a bial mipui tan ration card-a buhfai la zawng zawngte ama suma a khulhsak vek tur thu a puang nghal bawk a ni.
Nimin vek khan Commerce & Industry Minister Dr R Lalthangliana hian NABARD loan hnuaia Rs vbc 39.81 senga sak Tarpho Godown hawngin, a bialtu Lunglei DCSO kutah a statute hian an hlan nghal a ni.