Western Conference-ah tun season a NBA Playoffs a team tlo ni tura beisei zing ami Denver Nuggets in an chetfuh theih loh kaltluang an titawp a. Zirtawpni zing NBA inkhel hmuhnawm takah 121-120 in Portland Trail Blazers an hneh.
Portland a Moda Center a inkhelah hian a zawna vawi thum tlawm tawh Nuggets tan second 0.9-ah Jamal Murray chuan 3 points pawimawh tak mai a lut a. Point hniha hniam lai an nih chu nawtrehin point khatin hma an hruai a, an chakpui.
Nuggets leh Blazers inkhelah hian team pahnihten tum 20 lai hma an inhruai chhawk a, inkhel inhnehtawk leh hmuhnawmah Blazers tan star player inhliam avanga khel lo rei Damian Lillard chuan point 40 a score a. Chakpui turin erawh a tawk lo.
Denver tan Nikola Jokic chuan point 33 score in rebound 10 leh assist vawi 9 a nei a. Fourth quarter-ah point 10 in hniam zawk hman mahse an khingpuite an pawt thla leh thei a ni.
Season hmasa khup hliam avanga khel lo hrim hrim Murray-a’n point 21 a score a. Tun season-ah la chhawr rim ngam lo mahse a team tana a pawimawhna a lang. Nuggets coach Michael Malone chuan, “Season tirah hmanhmawh lo turin ka hrilh a, zawi zawia hma a sawn tur thu ka hrilh tawh. Zaninah kawng dik a zawh zel tih chiang takin a lang.” tiin a sawi.