Liverpool forward Luis Diaz chu Dubai a thlasik training camp an neihah a inhliam a, eng chen nge chawlh ngai tur club in an ngaichang mek.
Colombian winger hian hun engemaw chen chhung khup lama harsatna a neih avangin khelmual a lut mumal thei tawh lova. October 9 a Arsenal laka 3-2 a an tlawm hnuah a la inkhel leh lo.
Kum 25 mi hi World Cup laia season chawlh lailawk a nihlaia dam chiang tawh tura beisei a ni a. Jurgen Klopp-a squad hi a zawm a, mahse training-ah a inhliam belh.
Tunkarah Diaz hian training-ah harsatna a nei a, na a sawi avangin UK lamah a kir leh dawn a, club a medical team lamin uluk zawkin a hliam hi an endik leh ang.
Liverpool manager Klopp chuan Diaz chungchang bikah an thil chiang la awm lo mahse an tan chanchin lawmawm lo tak a nih thu a sawi a. “Helaia kan squad hruai hi a pumpui a thlirin an fitness a tha a, hma pawh an sawn hle. A lawmawm lo awm erawh Lucho hi a ni a. Training laiin na a sawi avangin a hliam endik leh a ngai ang. Ani tih loh chu kan tha tlang hlawm hle thung.” a ti.
Liverpool hian World Cup chawlh laiin Lyon leh AC Milan te nen friendly an khel dawn a. December 22 hian Manchester City nen Carabao Cup fourth round khelin season an chhunzawm ang.