Inrinni zing khan Zawlnuam leh Zamuang inkara Putar lui bulah Myanmar atanga dan kalha kuhva tawlhruk phurtu lirthei paruk a kang a, heng lirtheite hian ruihhlo siamna poppy seeds pawh an phur tel nia thudawn a ni.
Thudawnnain a sawi danin phal loh thil phurtu lirtheite kan chhan hi hriat a ni lo a. Myanmar lam atanga dan lova phurhluh kuhvate chu Mizoram hmun thenkhatah chhekkhawla Hachhek bial paltlanga Mizoram pawn lama phurh chhuah a nih thin thu sawiin, dan kalha kuhvaa sumdawnna hi Mizorama kuhva huan siama eizawngten an thar an hralh theih loh phah avangin an tawrh nasat thu a sawi.
Hachhek biala Kuhva chingtu pawl leh NGO hrang hrangte chuan Myanmar atanga dan kalha kuhva lakluhin harsatna a siamsak nasat thu leh an do thu vawi tam tak an sawi tawh a. Mizoram sorkarah pawh vawi tam tak thlen tawhin, Assam chief minister pawh hmu tawh chungin sorkar lam atangin an harsatna sutkian kawngah chanchin lawmawm an la dawng lo.
Khawthlang lam, Hachhek tlangdungah dan kalha kuhva ram dang atanga lakluh phurtuten harsatna an tawh thu hriat tur a awm zauh zauh tawh a. Heti chung hian Mizoram hmun thenkhata kudamah chuan dan kalha ram dang atanga kuhva lakluhte chhekkhawl a nih thu leh sorkar lamin an man loh thu thudawnna chuan a sawi a. Mizorama kuhva huan siamtuten dan kalha ram dang atanga kuhva lakluh avanga harsatna an tawh chu a nasat tawh thu thudawnna chuan a sawi bawk.
Hetih lai hian Hachhek biala YMA, Tuidam branch leh Tuidam-a kuhva chingtute chuan an kuhva tharte Assam lama hralh turin escort-tu tur mi rintlak ruat an tum thu an sawi a. Tuidam khaw mi, kuhva rah hralh tur neite chu December 12 zing dar 7:30-ah community hall-a kalkhawm an rel bawk a ni.