Nimin lawkah Mizoram khawthlang lam Zawlnuam leh Zamuang khaw inkara kuhva ro leh smuggling bungraw phur motor paruk lai mai hal a ni chuan mipui titi a ti tam hle mai. Mipuiin dan lova kuhva phurtute an dem rualin kuhva neitu lam thu leh hla ni awm tak social media lamah lo lang nghalin phuba lak duhna thinlung leh ralthuam an rawn sawi ri tel nghal bawk a. Ngaihthlak a va hrehawm em.
Hun rei tak chhung khawthlang lam kuhva chingtute chuan Burma lam atanga kuhva ro an rawn phurh avangin an kuhva an hralh theih loh thu an tlangau pui tawh a. Sawrkarah pawh vawi tam tak thlenin chief minister hialin chinfel pui thuai an nih tur thu a lo hrilh tawh bawk. Kuhva chingtute hian an kuhva hralh theih loh avang hian harsatna namen lo an tawk mek a. Kohhran thawhlawm pawh a tlahniam tan a, Krismas lo thleng tur thawhlawm thlengin a nghawng tan mek niin an sawi bawk. Mi thenkhat sawi dan phei chuan naupang zirna atana an lo in ruahmanna sum an hmuh leh hleih theih si loh avanga fate phai lama zirlai ko haw pawh an awm hial tawh a ni.
Kuhva chingtute hi sawrkarah an bei a dawng a. Sawrkarin dan leh thupek a kengkawh thei lo / duh si lo a. Dan lova che te avanga an manganna chu dan lo bawka chingfel turin hma an la ta mai niin a lang a. Khawvelah hian indona leh thil thleng rapthlak pui pui hi ei leh bara harsatna avang thleng a ni fo thin. Mizoram buai 1966 pawh kha mautam tam mangan hrinchhuah a ni kan ti thei ang. Khawthlang kuhva chingtute hian sawrkarah hun rei tak chhung chu an harsatna chinfel a nih beiseiin an nghak a. Mahse beisei tur awm tawh lova hria in anmahni thu in an che ta a. He thilah hian tumah dang dem tur awmin a lang lo.
Nikum lawk khan Punjab a kuthnathawktute lungawi lo chuan Delhi khawpui an luhchilh a nih kha. Mi beidawng chu eng ang pawhin an che thei. Kan sawrkarin dan a lekkawh loh avanga thleng liau liau a ni a. Sawrkar pawhin mawhphurhna hi amaha inbel ngam a ngai a. Hun lokal leh turah ralthuam hmanga smuggling kalpui pawh a la ni mai thei. Thihna rapthlak pui pui pawh a la thlen phah lovang tih sawi a har. Heng hun hi a lo thleng a nih pawhin tuna smugglers te thlah zalentu hian mawh a phur zel ngei ang. Chuvangin kan sawrkar hian a in enfiah a. Smugglers te a hup beh ran hi thil tul hmasa ber a ni.