India in G-20 Presidency dinhmun a chelh chungchanga G20 meeting peng hrang hranga thlen tur inbuatsaihna kal mekah Zirtawpni tlai khan Prime Minister Narendra Modi-a’n State leh UT tin Governor/Lt. Governor leh Chief Minister te video conference a neihpui a. Chief Minister Zoramthanga pawh a tel.
Union Home Minister Amit Shah chuan he thutkhawm hi a kaihruai a. Indian Emissary to G20 Amitabh Kant chuan G20 meeting thleng tur state te tana hriat tur pawimawh hrang hrang te a sawi.
Prime Minister chuan state tin thawhhona a pawimawh thu sawiin, G20 Presidency India-in a chelh chhung chu khawvel hmuhah India ram hmasawnna leh ropuinate phochhuahna hun tha a ni tih hriaa, mitin lungrual leh thahnemngai taka thawhho pawimawhna a sawi.
State hrang hrang mawina leh potential te pholan nan India ram khawpui hrang hranga meeting hmun ruahman a nih dan sawiin, state tin ten an theihna lo phochhuaka, hmasawnna remchangah an hman ngei a beisei thu a sawi bawk.
Sorkar thuchhuahin a tarlan danin Mizoram chu March 2023 thla ah G20 meeting thleng tura ruahman a ni a. He multilateral business partnership session hi insumdawntawnna leh thawhhona chungchang sawihona niin, bamboo/horticulture, handloom leh handicrafts bakah nursing & paramedics te thlurbing bik a ni ang.
G-20 hi ram 19 leh European Union ten khawvel pum economy-a harsatna thlentu hrang hrnag sutkian leh hmasawn tlan theihna tura forum din a ni a. Member-te chu Argentina, Australia, Brazil, Canada, China, France, Germany, In- dia, Indonesia, Italy, Japan, Mexico, Russia, Saudi Arabia, South Africa, South Korea, Turkey, Uni- ted Kingdom, United States leh European Union an ni a. India-in Presidency a chelh chhung hian Prime Minister Narendra Modi chu G20 Chairman a ni.