Tun World Cup-ah an squad thlirin mi tam takin champion turin an ring. An tlarhma in team te an nghaisa thei viau tih an lantir tawh. Tlin nan erawh a tawk lova, Croatia paltlang thei lovin quarter-final ah an tla.
Zirtawpni zanah kum 2018 final khel Croatia leh Brazil te Education City Stadium-ah an inkhel a. Penalty hmang a chak zawk zawn ngaiin Croatia tana pet tu pali ten an khung vek laiin Brazil tan Rodrygo pet chu an ram chhandamtu ni fo Croatia goalkeeper Dominik Livakovic chuan a dansak a. Marquinhos chuan goal ban pet per bawkin Croatia an chak.
Croatia an tlo
Hun pangngai inkhel a hmuhnawm a, Brazil in rinkai zawk ni a khelin inrintawkna an lantir.
Goal hlauhawm pawh Brazil in an siam hnem zawk a, nimahsela lehlam goal a ding Livakovic bawk a che tha a, save vawi 11 siamin an ram dampuitu a ni.
Zlatko Dalic-a’n a pawlte hi nghet taka ding turin a rem thin a, tlarhnungah khauh taka an din theih rualin an ball khawihah an buai lova. A bikin centre-half Josko Gvardiol bawk a pawimawh.
Extra-time ah Neymar-a’n footballer tha bik a nihna a lantir ta. Hun pekb elh chawlhlawk dawnah goal mawi a khung a, Brazil an lawm.
Mahse Croatia an zam miah lo. An player rinrawlte tawnhriat neih that tawk an chhawr a, awmze nei in huntawp dawn thleng football an khel.
Minute 117-naah a rah an seng a, substitute Bruno Petkovic chuan ‘shot on target’ an neih hmasak berah an si phurh a sut.
“Croatia mipuite tan”
An chak hnuah Dalić chuan, “A tir atanga a tawp thlengin tha takin kan khel a, champion tura rin ber kan hneh thei hi kan team pumpui ka lawmpui.”
“He hnehna hi Croat zawng zawng tan, Croatia rampum tan a ni. Croat mite hian hun harsa lai berah pawh an bei tang tang thin a, ram leh hnam hmangaihna in zaninah an bei a, an hlawhtling.” a ti.