- Ruata
Mahindra lifestyle SUV lar leh mawi em em, Mahindra Thar chhuak thar tur, tuna chhuak aia sei leh kawngka tam tur 5-door Mahindra Thar chu nakumah phochhuah a nih tawh beisei a ni.
Tuna Mahindra Thar chhuak mek hi 3-door niin a kawngka an chhiarah hian a hnunglam bungraw phurhna hawnna, a tailgate hi an chhiar tel thin a. 5 door lo chhuak tur hi chu a passenger luhna kawngka pali a awm tawh dawn tihna a nih chu. He Mahindra Thar 5-door lo chhuak tur hi rei tak atangin kan hre tawh a, tunah pawh India ram mipuite nghahhlelh em em a ni a. Tunhnaiah an enchhin lai thlalak, a lirthei pianphung leh lan dan tam zawk thup siin a darh leh nasa tawh a, hei hian a chhuak hnai tawh tih te pawh a tarlang ang chu.
Mahindra Thar 5 door hi a lo chhuah hunah chuan company dang atanga a lirthei huang inanpui, 5-door Maruti Suzuki Jimny leh 5-door Force Gurkha te a rawn el thei dawn a. A man tur hi a la hriat theih loh na a, tuna chhuak mek ai hian Rs. 70,000 – Rs 80,000 velin news report thenkhat chuan a to belh an beisei a. Hei ai pawh hian a to daih maithei a, hei hi chu thuchiang zawk a lo awm zel turah ngai ila. Tuna a 3-door version hi Rs Nuai 13.59 – 16.29 inkar man vel (ex-showroom) a ni mek.
Kan tarlan tawh angin he lirthei thar tur hi an enchhin lai hmun tam takah kan hmu tawh a. Internet-ah pawh zawn hmuh theih mai a ni tawh a ni. Tuna chhuak mek nena khaikhin chuan thil chiangsa chu a lian ang a, a chhung pawh a zau fe dawn tih a ni a, a thutna pawh a tam dawn bawk a ni. Hei vang hian a hmaa a thutna leh bungraw dahna tlem avanga Mahindra awt em em, lei thei si lo te nasa taka a hip beisei a ni a. Offroad lam ngaina te pawhin chhungkaw nitin hawlhchhuah lirthei tangkai takah an hmang tel thei tawh dawn tihna a ni a, hei hian leitu nasa taka a hip beisei a ni.
5 door Mahindra Thar hi tuna mi aiin zaa 15 velin a thui zawk ang a, a wheelbase pawh zaa 22 vel laiin a thui belh dawn bawk a. A vang lam leh a ke rahna lai inkar zau zawng pawh an tihsan hret beisei a ni a, hei hi a lirthei ngheh lehzual nan a tangkai dawn a ni. Tuna chhuak mek hi a a dung mm 3985 niin a wheelbase thui zawng hi mm 2450 a ni thung a. Kan tarlan thin tawh angin a wheelbase hi a ke hnung leh hma rahna inkar thui zawng sawina a ni. Heng a len belhna tur kan han sawi takte hi chu a kawngka a pun dawn a, a chhung a zau deuh dawn bawk chuan thil ngai ngei ngei a ni a, a lirthei pawh hian tuna chhuak mek nena khaikhin chuan a len phah deuh dawn a ni.
A khawl lamah chuan 2.2 litre mHawk diesel khawl leh 2.0 mStallion petrol khawl, tuna Mahindra Thar 3-door chhuak mekin a hman ang hi a hmang ang a. A body a len zawk dawn avangin company lam hian a body mil turin an siam (tune) chak hret maithei niin media report thenkhat chuan an tarlang bawk a ni. Mi 6 leh mi 7 chuan theihna tura duan a nih hmel a, a chhunga design leh kentel hrang hrangte chuan tuna chhuak nen hian a tam zawkah a inan hmel bawk a ni.
A lirthei lamdan hrim hrim hi tuna chhuak mek nen danglamna lutuk a awm loh hmel a, a sei ang a, hriat tham lutuk lohin a arh hret maitheih bakah kawngka pali a pangah kan hmu tawh dawn tih loh chu kawng tam takah a lirthei siam phung leh design hi a inan hmel a ni.
Mahindra Thar 5-door hi nakumah an phochhuah beisei a ni na a, lei theih tura tlangzarh tak tak hi chu kum 2024 bawr vel a nih beisei a ni a, hei ai pawh hian a hma thut thei bawk a. Engpawh ni se, company lam thu ngaihchan zel a ngai rih dawn a, a awt leh lei tumte chuan an la nghah rih lawk a ngai dawn.