Aizawl: Aizawl Municipal Corporation (AMC) hnuaia Enforcement staff-te chuan nimin atang khan AMC dan bawhchhiate enfiahna runpui a kalpui tan a, ni thum chhung awh tur a ni.
Enforcement checking hi group li-ah an inthen a, dawrkai zingah Single Use Plastic (SUP) lo la zuar lui an awm leh awm loh te, sorkar phal loh halpuah leh halmawi zuar lui te, phalna nei lova kawngsira thil zuar (hawker) te, AMC-a inziak lut lo dawrkai leh license renew lo te, parking area ni lova motor inhung leh AMC dan hrang hrang hnuaia phal loh thil tiluite pawh enfiah a, hrem ngaite hremin hrilhfiah ngaite an hrilhfiah zel a ni.
AMC chuan he endikna hian a tum ber chu sorkar leh khawpui enkawltuten dan hrang hrang an zamte chu sumdawng leh mipuiten tun aia an ngaih pawimawh zawk nan leh tha taka an zawm theih nana kalpui an nih thu an sawi a ni.