Aizawl: MNF Adviser Dr R Lalthangliana chuan MNF sorkarin harsatna lian tham tak a hmachhawn kara sorkar hmalakna a chhuanawm takzet tih a sawi.
Nimina Mizo Hnam Run chhung inkhawm hun hnihnaah thu sawiin Dr R Lalthangliana hian rorel ngawr ngawr hi a châka châk chi a ni lo a, ram siam hna thawk tura inpekna rilru nei a, hmanruaa inpek a ngai niin a sawi.
“MNF sorkarah harsatna liantham tak tak -Covid, vawk hri, raltlan, lirnghing leh ramri buai kan hmachhawn a. Hetiang buaina kara sorkar hmalakna a chhuanawm takzet a ni,” a ti.
Dr R Lalthangliana hian tun MNF sorkarin MLA tha a neih ang hi hriat a ni ngai lo tih sawiin, “Bial ngaihsak, mi thiam tak tak kan nei a, Pathian tih mi CM kan nei bawk a, hripui leh harsatna lian tak tak avangin ram siam hna thawk turin hna kan thawk tan chho thei dawn chauh a ni,” a ti bawk.
MNF adviser hian MNF hi ni pawimawh nei mumal ber an nih thu a sawi a. “Innghahna lungphum, Pathian leh kan ram tan, tih a ni a, kan ram aiin Pathian kan dah hmasa a. Pathiana innghat kan ni,” a ti a. Party tam tak hming thlakin an zuih ral tawh a, MNF erawh chu chawl miah loa diamond jubilee thleng thei an nih thu a sawi.
India rama tlachhe mek, Mizorama MLA an neih mek zat pawh nei tawh lo tur Congress hian MNF sorkar hi a thlak dawn lo tih a chian thu health minister hian a sawi a. Social media-a innghat, chhim lamah pawh thawm lian tak nei chunga nil ZPM pawh hian MNF sorkar hi a thlakin a rinawm loh tih sawiin, “Thawm chauh lian, tiau chunga in sa ang deuh an ni a. An la tuiril deuh. Vawikhatmah budget la pharh ve ngai lote tan tunlai thiamna sang tawh takah hian sorkar siam a beiseiawm loh a ni,” a ti bawk.
Mizo Hnam Run chhung inkhawm hi K. Vanlalauva, Treasurer, MNF-in a kaihruai a ni.