Aizawl : Tarpho khuaa Food Civil Supplies & Consumer Affairs Deptt Kudam leh hmasawnna ruhrel dang te chu Zirtawpni khan bialtu MLA, Minister ni bawk Dr. R. Lalthangliana’n a hawng a. A satu Babie Construction & Consultancy Services-in sorkar kutah an hlan nghal.
Bialtu Minister Dr. R. Lalthangliana chuan a bial chhungah Kudam thar hawn theih a nih avangin FCS&CA Deptt chungah lawmthu a sawi a, sorkarin mipuite tana hmasawnna ruhrel a din te chu a chhawr tangkaitu mipui ten neitu rilru pua uluk leh tha taka an enkawl a tul thu a sawi.
Sorkar thuchuahin a tarlan danin Tarpho, Khawhri leh Aithur khuate tana Buhfai chhekkhawlna Kudam hi NABARD Warehousing scheme hnuaiah Rs. 1,70,68,972 senga sak a ni a, He project hian Buhfai quintal 2000 lenna tur Kudam, Storekeeper 2 chenna tur building, toilet pahnih leh Kudam kawt zawl PCC flooring te a huam a ni.