Italy champion AC Milan chuan an forward Rafael Leao chu ngaihventu club pung mahse contract thar ziahpui a chelh zui zel theih an inbeisei.
Portugal international Leao hi season liamta atangin Europe club lian in an ngaihven nasa hle a, Scudetto an chawi theihna tura Rossoneri ralthuam tangkai a ni.
Season hmasa khan inkhelna hrang hrangah vawi 42 inkhelin goal 14 a khung bakah assist 12 a nei a. Tun season-ah goal sarih leh assist vawi 9 a nei leh tawh.
Kum 23 mi hi a bikin Premier League club te nen sawizawm a ni nasa zual a. Tunhnaiah Manchester United leh Chelsea ten an ngaihven nia thuthang a tam.
Milan in chelh ngei erawh an tum ruh hle a, an club legend Paolo Maldini chu inbiakna kalpui turin mawhphurhna an pe.
Rossoneri president Paolo Scaroni chuan, “Milan-ah hian nuam a ti a, club tana inkhelh zel hi a phur viau tih min hrilh. Maldini nen inbiakna an nei a, an inbiakna pawh a kaltluang a, chuvang chuan heng thuthangte hian min ti chiai pha lo.” tiin a sawi.
Leao hian kum 2024 thleng San Siro-ah hian contract a nei a. Hei vang hian hmun thenkhatah contract thar an ziahpui a nih loh chuan Milan in manto taka an hralh theih laiin nakkumah hralh mai an ui lo niin sawi a awm bawk.