- Rinfela Zadeng
Kan thupui khi Sap tawng nimah se kan hriat fo tawh hnu a nih a rinawm a. Tun lai khawvela Chanchin Tha kan puandarh dan chi khat, mi tam takin an bawh leh an ngaihven a ni a. Mizo te’n ‘Prosperity Gospel’ lam hawia Chanchin Tha hril thin kan hriat lar chu Joel Osteen, Joyce Meyer leh Benny Hinn te hi an ni awm e. Mizoramah ngei pawh hian bu khuar tumin a inlar ve tan niin a lang a. Chuvangin tun tumah hian ‘Prosperity Gospel’ chu eng nge a nih chiah tih hi kan thiam tawk tlemte hmangin kan zir dawn a ni.
Eng nge a awmzia?
January ni 1, 2014 – a Steve Corbert leh Brian Fikkert te lehkhabu ‘ When Helping Hurts’ ah chuan hetiang hian a inziak a – a bulpui berah chuan ‘Proeperity Gospel’ chu Pathianin rinna thuk zawk leh sang zawk nei te chu hausakna leh malsawmna tam zawkin a vur dawn a ni tih a zirtir a ni – tiin an sawi a. Hemi awmzia chu Pathian hi kan rinna thuk zawng mil zelin hriselna, hausakna leh malsawmna te kan dawng tam ang tihna a ni a. Pathian hi kan rin vak lo emaw kan ring zo vak lo emaw a nih chuan hriselna, malsawmna leh hausakna hi kan dawng ve lo ang tihna tluk a ni. Pathian kan rinna a thuk poh leh khawvel thilah pawh kan hausa ang tihna a nih chu.
A lo chhuah tan dan
Duke University-a Professor hna thawk Kate Bowler, Ph. D chuan June ni 7, 2016 khan ‘Blessed’ tih lehkhabu a chhuah a. Chutah chuan ‘Prosperity Gospel’ hi a chhui bing a. ‘Kum zabi sawmpakuana tawp lam leh kum zabi sawmhnihna tir lam atanga he ngaihdan thar hi vawrhchhuah a ni a. Pathianin ngaihtuahna hmanga khawvel a siam ang bawkin mihringte chuan anmahni khawvel chu an ngaihtuahna hmangin an siam a . Ngaihtuahna tha leh dik chuan dinhmun tha a chhuah a, ngaihtuahna tha lo leh dik lo chuan dinhmun tha lo a chhuah bawk a ni’ tih ngaihtuahna rilru pu atanga lo chhuak a ni tiin a sawi a.
Khawvela ram hausa USA te hi Indopui II-na hnu lama an lo hausakna chhan chu Chanchin Tha hriltute’n thilmak, tihdamna, sum leh pai lama hausakna te zawng tura mipui an fuihna vang a ni tiin a sawi bawk a. Hlawhchhamna te hi Pathian thiltih mak rin loh vang a ni a, chutiang rinna neih ve loh chu retheihna a ni tiin an zirtir thu a ziak.
A zia rang
Hausakna Chanchin Tha (Prosperity Gospel) hian chi hrang hrangin kan sawifiah thei ang a. Chutih rual chuan hlawm thumin a khaihkawm theih awm e.
- Rinna: Hausakna Chanchin Tha pawmtute chuan rinna hi an thupui ber a ni a. Rinna chu finfiahna awmsa nena inmil taka Pathian Thu puan chhuah ngawt kha a ni lo a, rinna chu ngaihtuahna tha leh Pathian thilpek malsawmna beisei a ni. Thil tha ngaihtuahna, rinna nena tih tak zeta kan rin chuan tisa lama malsawmna a thlen ngei ngei tur a ni. Hei hi hausakna chanchin tha hriltute rinna ngaihdan a ni.
- Hausakna: Prosperity Gospel chuan sum leh pai lama malsawmna hi Pathian rinna atanga lo chhuak a ni tih hi an pawm dan a ni a. Sum chu mi rinna tehna hmanraw hman tlanglawn leh hmantlak tak a ni.
- Hriselna: Prosperity Gospel ringtute tan chuan Pathianin mi rinawmte chu inremna siamna atan hriselna thain mal a sawm thin. Prosperity Gospel ringtu zawng zawngte chuan hriselna tha leh thlarau malsawmna inzawmna an hmu a. Hriselna chu thil tha ngaihtuah emaw, Isua’n a pek tawh hriselna emaw atanga lo chhuak a ni. Hrisel lohna hi Setana beihna, hneh loh la awm vang emaw, rinna chak lohna vang emaw a ni thei tiin an zirtir bawk.
A dik em?
David Wayne Jones leh Russell S. Woodbridge-a te chuan Kristiante tan rinna leh hausakna inzawmna hi dik taka hriatthiam a pawimawh zia an sawifiah a. “Hausakna chanchin tha hriltute sawi rinna leh hausakna inzawmna hian Kristian rinawmte’n a chang chuan an tuar chhan, emaw, mi fel lote’n a chang chuan an hlawhtlin chhan hriatna atana innghahna tlak thudik a tling lo” an ti a, a dik hle.
Hausakna leh hriselna hi miin rinna a neih dan atanga lo chhuak a nih chuan, hei hian mi retheite chu thlarau lama an tlakchham avangin rethei an ni tih thutluknaah a hruai lut a. Pathian thu awih tak tak, mi rethei an tamin, mi sual hausa tam tak an awm bawk.
Pathian thuawih zawng zawng an hausain an hrisel vek lo
Prosperity Gospel chuan mi mal chunga tisa lam hausakna pawimawhzia a sawi uar a. Bible-ah hian Pathian thuawih mi hausa Abrahama te entawn tur a awm laiin, mi rethei emaw, dam lo emaw, mahse rinawm em em Tirhkoh Paula te pawh entawn tur a ziak bawk. II Korinth 12: 7 – 9 – ah khan a taksaa hling awm kha lo bo turin Paula kha vawi thum a tawngtai thu kan hmu a; Pathian chhanna erawh chu khawngaihna hlutzia a ni.
Helaia Paula taksa hling hi chiang taka hriat theih ni lo mah se Bible zirnaah chuan taksa lama harsatna a nih ring an tam ber a. Mit (eye) tha lo emaw, lu na emaw malaria natna ang chi emaw hi Paula hian a vei a ni ang e tiin ESV Global Study Bible chuan a sawi bawk.
Covid – 19 hluar lai khan BCM Pastor Rev Lalhmingchhuanga Jongte chu Hripui vangin a boral a; Mizoram Synod Pastor Rev Vanalngeiha pawh he Hripui vang hian a boral bawk. Pasator leh Kohhran Upa, Pathianin a hman tak tak te hi Cancer leh natna danga boral leh rethei tak tak hi an tam em em a; khawvel awm chhungin chutiang chu a ni reng bawk ang.
Chuvangin he ‘Prosperity Gospel’ hi Bible-a innghat zirtirna dik tak nen chuan thil danglam tak a ni. I retheih avang te, i hrisel loh avang te, tihdamna awm lo natna i vei avang te hian Pathian i rinna a chak lo a ni lo a, mi sual tak i ni tihna a ni hek lo. Engkim famkimna zawk chu he khawvelah ni loin Vanramah zawk a ni.
Eng dinhmunah pawh awm la, Pathian khawngaihna avanga Lal Isua rinnaa chhandam i nihna hi Pathian thu dik kumhlun chu a ni e.