Lirthei ke hnih nei khalhtuten helmet him leh rintlak ngei an khum theih nan ‘satel helmet’ tia hriat lar chu umbo tum mek a ni a, hetihlai hian satel helmet khumte chu man ngei ngei tur tihna a nih loh chu Traffic Police hotuten an sawi.
The Zozam Times zawhna chhangin Aizawl Traffic Police hotute chuan The motor vehicle act- hnuaiah chuan Bureau of Indian Standard mil leh kalphung anga siam helmet khum tura tih a nih thu sawiin, satel helmet chu a him tawk loh avangin February 15, 2023 hmaa umbo tum a nih thu an sawi a ni.
Traffic police hotute chuan satel helmet chu a him lo va, lirthei ke hnih chetsualna thlengah pawh an lu lama hliam na tak tuarte chu satel helmet khumte an nih thin thu sawiin, “Helmet him tawk lo, satel helmet hi mipuiin hmang lo se kan duh a, chutihrualin hetiang helmet khumte hi kan man nghal zel dawn tihna a ni lo,” an ti.
ISI mark chuang helmet chauh khum tawh tur anga thuthang pawh a dik tawk lo tih an sawi a, “No tolerance drive kalpui meka duty leh traffic duty-ten helmet him hmang turin mipui an zirtir a, chutah chuan ISI mark chuang a rintlak thu te an sawi a, hemi avang hian ISI mark chuang khum lo chu man tur angin thawm a awm ta a ni,” an ti a; an tum ber zawk chu BSI standard mil leh a kalphunga siam helmet khum tura inzirtirna zawk a nih thu an sawi.
Helmet him khum tura mipui zirtirna pek a nih hnuah hian tun hnaiah helmet zawrhna dawrte a lun hle a, nimina The Zozam Times-in Aizawl chhunga helmet zawrhna dawr thenkhat a tlawhnaah dawr nghaktute chuan Thawhtanni tlai atang khan helmet leitu an pun thu an sawi.
Helmet dawr neitute chuan Thawhtanni tlai khan thahnem tak an hralh a, Thawhlehniah helmet 200 dawn an hralh hlawm thu an sawi a, hetiang ang renga helmet an hralh tam hi an la tawng ngai lo tih an sawi.