Mizoram sorkara minister of state, Dr K Beichhua-a’n Chief Minister Zoramthanga’n bânna thehlut tura a tih angin nimin khan minister a nihna atanga bânna a thehlut a. Hotute thupek kenkawh kawnga rinawm leh thuawih lutuk chu a tawrh ve theih dawn niin a sawi.
Dr K Beichhua chuan nimin chawhnu dar 1 vel khan Chief Minister Zoramthanga chu a pisaah hmuin minister of state a nihna atanga bânna chu a thehlut a, MADC-a MDC nilai mi pahnih, Siaha district MNF hruaitute leh MNF general headquarters-a hruaitu thenkhatin an tawiawm.
Bânna a thehluh zawha thuthar thehdarhtuten an kawmnaah Dr K Beichhua chuan December 12, 2022-ah chief minister hnen atanga lehkha a dawn thu sawiin, “Lehkhaah chuan, ‘Ka cabinet member-te hna chanpual ka siam danglam duh a, nang pawh minister of state i nihna angin a rang lamin bânna rawn thehlut ta che,’ a rawn ti,” a ti a. Chief minister atanga a thu dawn bawhzui chuan bânna chu a thehlut ta niin a sawi.
Minister atanga bânna a thehluh chhan chu Mara Autonomous District Council buaina vang a nih leh nih loh The Zozam Times-in a zawhna chu Dr K Beichhua chuan bânna thehlut tura tih a nih chhan sawi mai theih a neih loh thuin a chhang.
“Ka rin danah chuan hotute thupek kenkawh kawngah hian rinawm leh thuawih lutuk hi a tawrh ve theih dawn a nih hi,” a ti.
MNF party atanga hnawhchhuah a nih loh thu leh rinawm taka MNF party-a a awm mek thu a sawi rualin, a hma lam hun tur sawi theih a neih loh thu erawh Dr K Beichhua chuan a sawi a. MLA atana thlang tlingtu, a bial mipuite thu leh hla anga kal tura a inngaih thu a sawi.
Dr K Beichhua chuan a chunga thil thleng chungchangah Pathian hnenah lawmthu a sawi tih sawiin, ama tan leh Zoram tana thatna tur zawk nia a pawm thu te, chu chu a tawngtaina a nih thu te a sawi a. “Zoram mipui hnenah rinawmna, huaisenna leh taimakna nen pheikhai rual takin he ram hi lungrual takin i enkawl ang u tih hi ka chah duh a ni,” a ti bawk.