Aizawl Chanmari-a Liannawla (L) building, Assam type chhawng li leh a bula RCC building-a cheng chhungkaw paruk bungrua chu engmah chuh hman lohin a kang ral a, thi leh hliam an awm lo.
Chanmari khawtlang hruaituten an sawi danin kangmei hi nimin chhun dar 12:30 vel khan Assam type chhawng hnuai atangin a chhuak tana ngaih a ni a, fire department ten thelh mih tumin theihtawp chhuah mah se Assam type chhawng li chu a kang ral vek a, a chhaka Liannawla in tho, RCC building chu kang kaiin, a puma a kan hmaa thelh mih a ni.
Assam type kang ral ta chu chhungkaw pahnih luah lai a ni a, a chhaka RCC building kang kaiah in hnuai lam chhungkaw parukte chenna bungrua pawh engmah chuh hman a ni lo va, in kangah hian eirawngbawlna gas bur 10 vel a puak nia hriat a ni.
He in kang hian a bulhnaia in thenkhatte pawh a hliau nasa hman hle a, heng a bulhnai ina bungrua a kan chhiat dan erawh hriat chian a la ni lo thung.
Chanmari khawtlang hruaitute chuan in kang raltaa chengte chu YMA Hall-ah an awmna tur buatsaihsak nghalin, nimin tlai zanriah pawh an buatsaihsak nghal tih an sawi a. Vawiin lamah kangmei sulhnu senghawia an hnatlan tur thu an sawi.
Kangmei a chhuah hian fire department bakah mi tlawmngaiten a thelh hna an thawk nghal a, Aizawl chhunga tui phur pick-up pariatin an tui phurhte chu kang thelh nan an hmang bawk.
Kangmei chhuakah hian mihring thi leh hliam an awm hriat a ni lo.