Portland Trail Blazers star Damian Lillard chuan Blazers tan regular-season franchise record amah ngeiin a lo siam tawh chu a tluk a. Minnesota Timberwolves 133-112 a an hnehna kawngah 3 points vawi 11 a lut.
Thawhlehni zinga Portland a Moda Center a inkhelah Lillard hian 3 points vawi 17 a shoot atangin vawi 11 a lut a. Fourth quarter a khelh ngai lo khawpin a team dinhmun a siamtha a. Point 38 a score.
Blazers hi he inkhelah hian hmahruaitu an ni tluan zak a, point 27 a hma hruai lai te an nei.
Kum 32 mi Lillard hian regular season inkhel a 3 points vawi 11 a luh tum thumna a ni a. Hemi kawngah hian Golden State Warriors star Stephen Curry chauh a pha lova. A hnuaiah Klay Thompson awm ve thungin an pathum chiahin inkhel vawikhat aia tam hetiang ti thei an ni.
“3 points ka luh zat kha ka lo hre lova, ka ngaihtuah lem lo. Ball shoot chiah kha ka rilruah a awm a, 10 ai chuan a tam tih ka chu ka hria. Ka lut hnem riau khan ka hria a, a hnu lamah chauh khan hetiang ngaihtuahna ka nei.” tiin a sawi.
Portland coach Chauncey Billups chuan, “A kut a kal hle a, a kaltluan lai hi chuan a inkhel en hi a nuam. Chawlh hahdam pawh a mamawh ve thova, kan mamawh hun takah a rawn che a, hnehna kan chan kha a pawimawh.” tiin fourth quarter a khelh tir loh chhan a sawi.
Portland tan Jerami Grant chuan point 24 score in Jusuf Nurkic chuan point 14 leh rebound 16 a la ve bawk a. Minnesota tan D’Angelo Russell chuan point 23 score in Rudy Gobert chuan point 16 leh rebound 20 a la.
Inkhel dangah Los Angeles Clippers in Blazers chu Western Conference atanga NBA Playoffs khel tura intlansiaknaah an um chhunzawm a. 113-93 in Boston Celtics an hneh.
Clippers tan star player Kawhi Leonard chuan khup hliam avanga hun rei tak a chawlh hnua a khelh that ber tum a hmang a. Ball a shoot vawi 12 atang vawi 10 a lut a, point 25 score in rebound vawi 9 a lak bakah assist vawi 6 a nei.
Clippers hi West-ah pasarihna niin match 29 atangin vawi 16 an chak tawh.