Ukrainian thuneitute chuan Nilaini zing hma takah khan Russia-in Kyiv an beihnaah an drone tam tak an kap thla tih an sawi.
Khawpui ber beih a nih hma hian air raid siren tihrik a ni a, a hnu lawkah thil puak thawm a awm zui tih BBC chuan a tar lang.
Thil puak hi khawpui laili, Shevchenkivskyi district-ah a ni a, air defence system hmangin Iranian siam Shahed drone eng emaw zat an kap thla bawk.
Russia hian October thla atang khan missile leh drone hmangin Ukrainian energy infrastructure-te a la beih chhunzawm zel.
Kyiv Governor Oleksiy Kuleba chuan Russia hi ‘kan ram lakah energy terror an nih chhunzaw zel’ tia sawiin tuna beihna hi drone hmang a nih thu a sawi.
Hetih lai hian national energy grid manager Ukrenergo chuan Nilainia Moscow chet thar lehna hian an energy facility engmah tihchhiat a nei lo tih a sawi a, ‘air defence force-ten hna ropui tak an thawk’ tiin Telegram-a an account-ah fakna thu a tar lang.
President Volodymyr Zelensky chuan Ukrainian sipaite hian Shahed drone 13 an kah thlak thu a sawi a, hengte hi Russia kah chhuah vek a ni tih a sawi.
Governor Kuleba chuan drone tla darh chuan administrative office leh mi chenna in pali a fuh tih a sawi a; mahse, city emergency services thupuangtu chuan mihring thi an awm lo tih Ukrainian chanchinbute hnenah a sawi.
Thil thleng hmutu, Svetlana-i chuan drone beihna hmasa ber hi zing dar 6:30 (India-a chawhma dar 10:00) a nih thu BBC a hrilh.
“Chhuat nawh rik nawk nawk angin thawm a awm a. In phenah ka biru nghal a, thil puak ring takin a zui nghal,” a ti.
“Thlasik a intan mek zel a, engtin nge mihring kan dam chhuah ang? Lalpa, keimahni atang hian eng nge an duh ni ang? Ukrainian-te dama an awm hi an duh lo a ni,” a ti.
Kyiv-a cheng ve tho, Anton chuan thil puak nghawrin darthlalang a tikeh chuai chuai a, a tla darh chuan a fate a fuh lo chiah chiah tih BBC a hrilh bawk.
“He Putin-a hi thi rawh se,” a ti a. “A lakah engmah tih ka nei lo; mahse, ka chungah hetiang hian a ti si,” a ti.
Ukraine chuan Russia hnenah hian Iran chuan ‘kamikaze’ drone a leitir nasa tih sawiin he hmanrua hi October 17-a beihnaah khan an hmang niin a puh a, Tehran chuan a pha thung.
A hnuah Iran hian Moscow hnenah hian indo hma thleng eng emaw zatah khan drone tlem a leitir thu a sawi leh hnuhnawh.
Ukrainian President Zelensky erawh chuan hei hi dawt a nih thu leh an ram beih nan Iranian drone thahnem tak hman a nih thu a sawi.
Russia hian tun hnaiah energy grid a bei nasa a, Ukraine chuan a ram mipuite che thei lova siam a tumna niin a puh.
Khawvel ram hruaitute pawhin civilian-te hmun beih chu war crime a nih thu an sawi a; mahse, kar hmasa khan Russian President Vladimir Putin chuan October 8-a an awp lai, Crimea-a lei beih phuba lakna a nih thu a sawi ve thung.