Naupang pakhat telin, mi 14 lai Andhra Pradesh-a Kurnool-ah nimin tuk hma taka bus leh truck insu-ah an thi.
Naupang pali chiah an dam chhuak a, pahnih chu an na hle nghe nghe a. Aadhaar card leh phone number atangin police-te chuan an chhui zui mek.
Chetsualna hi Kurnool district-a Veldurti Mandal khaw bul lawka thleng niin mi 18 chuanna mini bus chuan kawngpui laia daidanna (road divider) chu na taka suin lehlama a inbin phei chuan anmahni tawk zawnga tlan lorry a su leh a ni.
“Mi 18 an chuang a, zing dar 4:00 vela Madapuram bul, Veldurti Mandal-a thleng a ni a, Kurnool atanga km 25 vela hla a ni,” tiin Kurnool police chief K Fakirappa chuan NDTV a hrilh.
“Bus-a chuangte hi Madanapalle, Chittoor district atanga Ajmer, Rajasthan pan tur an ni,” a ti a. Bus kar atang pawh hian lak chhuah an har hle a, khawl nena thawk chhuakin lak chhuah an ni tih a sawi.
Andhra Pradesh Chief Minister YS Jagan Mohan Reddy chuan chhiatna thlengin a barakhaih thu a sawi a. Chhanchhuah hna thawktute chu rang taka che turin damdawi thiamte pawh phe vat vat turin a ti a, thi chhungte a tawrhpui thu leh hliam tuarte pawh dam leh thuai turin duhsakna a hlan.
Police-te chuan chhiatna thlen dan chhui nghalin a khalhtu chu a muthlu palh ngei, a ke puakin a thunun zo lo tih an chhui mek.