Indian sorkarin Arunachal Pradesh ramri-ah December 9 khan Indian leh Chinese sipaite an intibuai tih a puan tukah chuan buaina awm hmasaa thil thlen dan lanna video thehdarh zui a ni.
Video hi nikuma thil thleng tawh kha niin Zirtawpnia buaina chhuahna hmun tho, Tawang-a thleng a ni.
Indian Army chuan video darh thar mek hi December 9-a thil thleng nen inkaihhnawihna engmah a awm lo tih a sawi.
Clip hi Line of Actual Control (LAC) bul, Yangtse sector-a June, 2020-a Galwan Valley, Ladakh khawchhak lama buaina a chhuah hnu lawka thleng ni awm tak a ni a. Galwan Valley-a buainaah hian India chuan a sipai 20 chânin Chinese sipai pawh 40 vel thi leh hliam an awm.
Video-a a lan dan chuan Indian sipaiten an awmhmun luah laia awm tum Chinese sipaite chu lo hmachhawnin, awiah an nawr let tih a lang.
Indian sipaite hian tharum hmangin ramri kân tum Chinese sipaite chu tiangin an lo vua tih pawh a lang.
“Na takin vaw rawh, kir an tum lo a nia,” tia sipaiten Punjabi-a an sawi ri lai pawh a lang.
“A lu-ah vaw rawh. Um tlan rawh, tlanchhiattir rawh,” tia au pawh hriat theih a ni.
Indian sipaite hian tiang leh kutlawnga an lo beih avangin Chinese sipaite kal zel tur chu an hnawt kir niin a lang.
Video hi kar hmasaa thil thleng puan a nih hnu lawk atangin politics hruaitu tam takin an vawrh darh nghal.
Parliament thlasik thutkhawm neih mekah Thawhlehni khan Defence Minister Rajnath Singh chuan China-in helai hmunah tho hian December 9 khan ram luah tuma an chet thu a sawi.
Kutlawnga innawrna a thlen thu leh Indian sipaiten ‘Chinese sipaite chu hlawhtling takin an awmhmun ngaiah an nawr kir’ tih a sawi.
Lehlam lehlamah hliam tenau tuar an awm tih a sawi a, buaina hmun atang hian an tawlhkir zui ve ve tih a sawi bawk.
Chinese sipaite chuan ‘Yangtse leh Tawang-a LAC chu kân an tum’ niin defence minister chuan a sawi a. “A hun taka Indian sipai commander-te an inrawlh avangin Chinese sipaite hi an awmhmunah an kir leh a ni,” a ti.
Commander-te inbiaknaah hian Chinese-te chu hetianga chet thawh tawh lo tur leh ramri-ah himna leh muanna vawng nung tura ngen an nih thu Singh-a chuan a sawi a. Buaina chu palai tira sawiho a nih tur thu a sawi bawk.
China chuan thil thleng chungchang hi a sawi ve lo va, ramri chu ‘a tlangpuiin a muanawm’ tih chauh a sawi.