Aizawl: MNF president, chief minister ni bawk, Zoramthangan eptuten amah beihna tur an dap chawp ta mah mah niin a sawi.
He thu hi nimina Aizawl East I South Block MNF Conference leh mi thar lawm luhna, Art & Culture Auditorium, Beraw Tlanga neihah Zoramthanga chuan a sawi a. “‘Sairanga vai pakhat nen smuggling an titlang,’ tiin a mik amak pawh hre ve lo kan fanute thleng thlengin dawt ngialngan lutuk hmangin min han bei mai a, sorkar sum leh pai harsatna pawh ka sum enkawl thiam lohah an puh a, min beitute hian an dapchawp khawp mai,” a ti.
Covid-19 leng avanga cental atanga sum hmuh tur Rs vaibelchhe 3,000 chuang ngawt hmuh loh chu state-te tan chuan harsat em em phahna tur khawp a nih thu Zoramthanga chuan a sawi.
MNF president chuan eptu party chungchang sawiin, “Congress party chu beih hran an ngai tawh lo va, MLA pahnih an neih chuan an vannei hle ang,” a ti.
ZPM chu eng emaw hleka kalphung thar nei reng mai, kum 30 dawn mipui enchhin tura inzuar tawh hruaitu nei an ni tih sawiin, “Hetiang hruaitu hi mipui hian an ring thei thlawt lo a ni tih a chiang hle,” a ti.
Aizawl East I South Block Conference-ah hian MNF Treasurer K Vanlalauva, MNF Adviser Robert Romawia Royte te pawhin thu an sawi a, bialtu MLA Zoramthanga’n MLA fund hmanga lei, puanthui khawl a sem bakah MNF zawm thar mi 644 lawm luhna hun hman a ni bawk.