Mizoram Food & Allied Industries Corporation Limited (MIFCO) chu an Chairman Commerce & Industries Minister Dr. R. Lalthangliana kaihhruaiin nimin khan an thukhawm a. Commerce & Industries, Agriculture leh Horticulture department te nen tangruala Commerce & Industry Secretary kaihruai Coordination Committee din ni se, an ti.
Minister hova thukhawm chuan Coordination Committee chu Agriculture production, supply chain management leh processing atan Mizorama Lakhuihthei, Sapthei leh thil dang tharchhuahte mumal zawka tihral dan kawng ngaihtuahtu tur a nih thu an sawi.
MIFCO chairman Minister Dr. R Lalthangliana chuan Mizorama kuthnathawktute tharchhuah hlawk zawka hralh a nih theihna turin food processing leh a vawnthat (preservation) kawngah nasa takin MIFCO-in hma a la niin a sawi a. State sorkar pawhin theihtawp chhuahin kuthnathawktute hamthatna a kalpui zel dawn tih sawiin, Mizorama tharchhuah te chu tualchhung bakah state pawn thlenga hralhna tur siamsak mek zel an nih thu a sawi.
Kuthnathawktute chu ei leh bara ram intodelh tirtu an nih thu sawiin, sorkar pawhin a ngai pawimawh reng tih a sawi a. Kum 5 vel kalta chhungin MIFCO-in Lakhuihthei leh Sapthei thartute hnen atangin a lei reng tih sawiin, a tam ber chu state pawnah hralh chhuah thin a nih thu a sawi.
Mizoram sorkarin mahni hlawh thawkchhuak tura Corporation din aiin mimal sumdawnna (entrepreneurship) leh pawl (Society, Group etc) te dawmkan, tanpui leh kawng kawhhmuh (facilitate)-in Food processing lamah hmasawnna chak zawk a thlen dawn tih hriain MIFCO chu Mizoram Food Processing Agency (MIFPA)-ah thlak turin hma a la mek tih Dr R Lalthangliana chuan a sawi a. Hei hian Pradhan Mantri Formalisation of Micro food processing Enterprises (PMFME) scheme tihhlawhtinna kawngah nasa takin a puih dawn niin a sawi bawk.
MIFCO hi ni 19.12.1989 ah Companies Act, 1956 tlawhchhanin, Register of Companies (ROC) Shillong-ah inziakluta din a ni a, a ngheta thawk 21 leh thawktu nghetlo 6 an awm mek a ni.